Segja fjárveitingar ekki í samræmi við álag

Stjórn Læknaráðs Landspítala lýsir yfir vonbrigðum með að meirihluti fjárlaganefndar Alþingis, svo og fjármálaráðuneytið og ráðuneyti heilbrigðismála byggi fjárveitingar til Landspítalans á mönnunaráætlunum sem ekki er í samræmi við álag sem er á starfseminni.

Þetta kemur fram í ályktun stjórnarinnar frá því í dag.

Þar segir að nauðsynlegt sé að mæta vaxandi eftirspurn eftir þjónustu spítalans, sem vaxi að meðaltali um tvö prósent á milli ára.

„Læknar og annað starfsfólk Landspítala eru nú þegar undir of miklu álagi í störfum sínum og búa við ófullnægjandi og þröng starfsskilyrði í mörgum tilvikum, sem bæta þarf úr.“

Ennfremur segir í ályktuninni að ábyrgð á starfsemi spítalans, þjónustu við sjúklinga og öryggi þeirra liggi hjá yfirvöldum. Alþingi beri að tryggja að fjármögnun starfseminnar sé í samræmi við verkefni og hlutverk.

„Það eru mikil vonbrigði að það sé ekki ætlun stjórnvalda í fjárlögum ársins 2016.“