Matur

Eurovision-uppskriftir: Ljúffeng ídýfa og súkkulaðimús

sunna karen sigurþórsdóttir skrifar
Auðveldur veislukostur.
Auðveldur veislukostur. vísir/thelma þorbergsdóttir

Veislur eru algengar á Eurovision-kvöldi en tími til veisluhalda er oft af skornum skammti. Thelma Þorbergsdóttir matgæðingur tók því saman þessar góðu uppskriftir sem hún segir að taki enga stund að gera.

Fersk mexíkó salsa ídýfa

Hráefni:

1-2 rauðlaukar

450 g rjómaostur

1 dós af mildri salsasósu

5 tómatar

1 gúrka

1 rauð paprika

½ kálhaus

Lýsing:

Takið utan af lauknum, skerið í grófa bita og setjið í matvinnsluvél. Hakkið laukinn þar til hann verður fínsaxaður. Dreifið honum jafnt og þétt í botninn á meðalstóru formi. Setjið rjómaostinn í matvinnsluvél og hrærið þar til hann verður mjúkur og sléttur. Blandið salsasósunni saman við og hrærið vel saman. Dreifið úr blöndunni yfir rauðlaukinn og sléttið vel úr með sleif. Skerið tómatana til helminga og takið innan úr þeim. Skerið þá mjög smátt niður og dreifið yfir blönduna. Því næst skerið þið gúrkuna og paprikuna smátt niður og dreifið jafnt og þétt yfir tómatana. Skerið kálið niður mjög smátt og dreifið yfir allt saman. Geymið ídýfuna inni í kæli þar til hún er borin fram.

Sniðugt er að skreyta kræsingarnar með fánum.vísir/thelma þorbergsdóttir

Kaffi súkkulaðimús með rjóma

Það má heldur ekki gleyma súkkulaðigrísunum. Þessi uppskrift tekur þó örlítið lengri tíma en er vel þess virði.

Innihald:

100 gr 56% Konsum suðusúkkulaði

1 msk instant kaffi 

6 stk eggjahvítur

90 gr sykur 

8 stk Oreo kexkökur

250 ml rjómi

30 gr smjör

Toppur:

¼ lítri rjómi

Lýsing:

Súkkulaðimús

Hakkið Oreo kexkökur í matvinnsluvél og setjið 1-2 msk af kexinu í hvert glas fyrir sig. Bræðið smjör og súkkulaði saman í potti yfir meðalháum hita og hrærið þar til súkkulaðið hefur bráðnað alveg. Bætið kaffi saman við og hrærið. Látið súkkulaðið kólna á meðan þið undirbúið rest. 

Hrærið eggjahvítur og sykur saman þar til blandan er orðin alveg stíf líkt og marengs. Blandið súkkulaðinu varlega saman við ásamt þeyttum rjóma og hrærið með sleif þar til allt hefur blandast vel saman. Sprautið súkkulaðimúsinni í glös og setjið inn í ísskáp í minnst tvær klukkustundir.

Toppur:

Þeytið rjóma og sprautið ofan á hverja mús fyrir sig. Skreytið með restinni af hakkaða Oreo kexinu að vild.



Hvaða Eurovision-lög eru best þetta árið? Taktu þátt í könnun Vísis hér.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.