Skuldir heimilanna lækka

Skuldir heimila námu rúmlega 90,5 prósentum af landsframleiðslu í árslok 2014. Að raunvirði lækkuðu skuldir heimila um 1,5 prósent á liðnu ári. Í hlutfalli af landsframleiðslu lækkuðu þær um tæplega 10 prósent á árinu. Til samanburðar lækkuðu skuldir heimila um 5 prósent árið 2013 og 3,5 prósent árið 2012. Þetta kemur fram í ritinu Fjármálastöðugleiki sem Seðlabankinn gaf út í gær.

Már Guðmundsson seðlabankastjóri og Sigríður Benediktsdóttir, forstöðumaður fjármálastöðugleika Seðlabankans, kynntu ritið í gær.

„Það er mesta lækkun á skuldum heimila sem hlutfall af vergri landsframleiðslu frá því að fjármalaáfallið hófst,“ sagði Sigríður Benediktsdóttir á fundinum. Sigríður benti á að í alþjóðlegum samanburði hefðu skuldir heimila hækkað upp úr öllu valdi en væru teknar að lækka aftur mjög hratt. „Einu þjóðirnar þar sem heimili hafa verið að minnka skuldsetningu sína eru í raun Írland og Ísland. Önnur heimili hafa í raun verið að auka skuldsetningu,“ sagði Sigríður.

Í skýrslunni er bent á að skuldir hafi ekki verið lægri síðan 2004 sé tekið mið af landsframleiðslu. Lækkun á hlutfallinu megi bæði rekja til lækkunar á nafnvirði skulda og aukinnar landsframleiðslu. Lækkun á nafnvirði skulda megi síðan bæði rekja til lítillar verðbólgu á síðasta ári og aðgerða stjórnvalda um niðurfærslu verðtryggðra lána.

Sigríður sagði að langtímaáhrif skuldaniðurfærslu ríkisstjórnarinnar á verðtryggðum lánum væru óljós. „Þau eru öll háð því í hvaða mæli heimilin munu taka ný lán gegn því aukna svigrúmi sem þarna myndast. Við þurfum að bíða aðeins lengur áður en stóri dómur fellur varðandi það hver skuldsetning heimila verður í framtíðinni,“ sagði hún.

Sigríður benti einnig á að hrein eign heimila, sem hlutfall af ráðstöfunartekjum, hefði aldrei verið meiri en í lok síðasta árs. Hrein eign heimila var þá 505 prósent af ráðstöfunartekjum en þetta hlutfall var 380 prósent í lok árs 2008.

jonhakon@frettabladid.is