Eignir lífeyrissjóðanna ríflega tvöfaldast

Eignir lífeyrissjóðanna hafa ríflega tvöfaldast frá aldamótum og námu um 3.000 milljörðum króna síðastliðin áramót. Það er ríflega ein og hálf landsframleiðsla. Þetta kom fram í Markaðspunktum Arion banka sem komu út í gær.

Greining Arion banka telur að staða íslenskra lífeyrissjóða sé á heildina litið nokkuð sterk. Hrein raunávöxtun þeirra hafi farið batnandi síðustu ár eftir að hafa verið innan við 1% á árunum 2007 og 2009 og neikvæð um 22% árið 2008. Á árunum 2010-2011 var ávöxtunin komin yfir 2% og upp í 7,3% árið 2012.

Á árinu 2014 er áætlað að raunávöxtunin hafi verið 7,2%. Slík ávöxtun myndi tvöfalda eignirnar á tíu árum. Engu að síður eru lífeyrissjóðir skyldaðir til að miða við 3,5% ávöxtunarkröfu við núvirðingu á framtíðarskuldbindingum. Greining segir meðalraunávöxtun síðastliðinna 13 ára vera lítillega undir því, eða 3,2%.

Greining segir mikilvægt að hafa í huga að markmið lífeyrissjóða sé ekki að stækka eignasafnið, ávöxtunin sé mun mikilvægari. „Þó er mikilvægt að lífeyrissjóðirnir auki við eignir um þessar mundir því aldurssamsetning þjóðarinnar mun breytast á næstu áratugum þar sem þjóðin er að eldast. Þá mun hlutfallið milli eftirlaunaþega og launþega hækka sem þýðir að meira fer út úr lífeyrissjóðum heldur en inn í þá, miðað við stöðuna í dag,“ segir Greining.