Svíarnir kaupa allt hlutaféð í Advania

Aðaleigandi Advania, AdvInvest, hefur samið við Framtakssjóð Íslands (FSÍ) um kaup á öllu hlutafé sjóðsins í fyrirtækinu. Þá kveður samkomulagið á um að öðrum hluthöfum verði boðið að selja hlut sinn á sömu kjörum.

Jafnframt er stefnt að skráningu Advania í Kauphöll Íslands árið 2016 og í kjölfarið verður félagið skráð í kauphöllinni í Stokkhólmi. Með skráningu á Íslandi gefst almennum fjárfestum tækifæri til að fjárfesta í íslensku upplýsingatæknifyrirtæki með alþjóðalega starfsemi.

Gestur G. Gestsson, forstjóri Advania, segir kaup AdvInvest á 58,5% hlut í Advania af FSÍ um mitt síðasta ár enn vera stærstu erlendu fjárfestinguna í upplýsingatækni á Íslandi frá hruni. „Á þeim tíma vildi FSÍ ekki selja allan hlut sinn í Advania þrátt fyrir að AdvInvest hafi sóst eftir því. Áform um skráningu í Kauphöll á Íslandi og góður gangur í uppbyggingu Advania sem íslensks fyrirtækis í alþjóðastarfsemi, auk þeirrar virðisaukningar sem það hefur skapað, gerði það að verkum að FSÍ var tilbúið til að selja hlut sinn nú,“ segir hann.

Gestur segir jafnframt að þessi fjárfesting sýni tiltrú á íslensku atvinnulífi og grundvelli þess að reka upplýsingatæknifyrirtæki hérlendis.

Gestur segir að eigendur Advania leggi áherslu á að kjarninn í starfsemi Advania verði áfram á Íslandi. AdvInvest er í eigu norrænna fjárfesta sem hafa langa og farsæla reynslu í upplýsingatækni og er leitt af Thomas Ivarson sem er í dag stjórnarformaður Advania.

„Í því verkefni að byggja upp öflugt norrænt upplýsingatæknifyrirtæki hefur það reynst gríðarlegur styrkur fyrir stjórnendur Advania að hafa aðgengi að þeirri þekkingu, reynslu og tengslaneti sem AdvInvest kom með að stjórnarborðinu,“ segir hann. Gestur segir að aðkoma nýrra eigenda hafi þegar skilað nýjum verkefnum til Advania og fjölgað störfum hjá fyrirtækinu á Íslandi.

Advania verður áfram íslenskt fyrirtæki með höfuðstöðvar og kjarna allrar sinnar starfsemi á Íslandi. Gestur segir einnig að starfsemi Advania á Íslandi muni aukast, enda hafi það ótalmarga kosti í för með sér að reka upplýsingatæknifyrirtæki hér heima. „Við búum yfir mjög hæfu fólki sem er tilbúið að leggja mikið á sig og takast á við ögrandi verkefni,“ segir Gestur.