Hagvöxtur með því mesta í heimi

Þrátt fyrir mikla óvissu í efnahagsmálum gerir greiningardeild Arion banka ráð fyrir að hagvöxtur hér á landi verði einn sá mesti í heimi á næstu árum. Þá er gert ráð fyrir umtalsverðum launahækkunum sem muni leiða til aukinnar verðbólgu.

Greiningardeild Arion banka kynnti í dag efnahagshorfur til næstu tveggja ára undir yfirskriftinni „Ólga í lygnum sjó“. Vísar titillinn til þess að þótt efnahagshorfur hér á landi séu almennt góðar, séu margir óvissuþættir fyrir hendi.

Helstu óvissuþættir í hagspánni eru launahækkanir, fjárfesting og aflétting hafta. Bankinn gerir ráð fyrir umtalsverðum launahækkunum út spátímann og að launavísitalan muni hækka um 7,1% á þessu ári. Þetta muni, ásamt þróun olíuverðs og hækkun á fasteignamarkaði, leiða til aukinnar verðbólgu næstu ár. Hún verði 1,8% á þessu ári, 3,4% á því næsta og 2,9% árið 2017.



Aukinn hagvöxtur

Þrátt fyrir þessa óvissu gerir greiningardeildin ráð fyrir auknum hagvexti. Hann var í fyrra 1,9 prósent en deildin gerir ráð fyrir að hann verði 2,8 prósent í ár, 3,3 prósent á næsta ári og verði kominn í 3,5% árið 2017.



Bankinn gerir þannig ráð fyrir að hagvöxtur hér á landi verði mun meiri en í helstu viðskiptalöndum Íslands, jafnvel einn sá mesti í heimi. Gangi spá bankans eftir verður hagvöxtur á næsta ári einungis meiri í tveimur löndum sem teljast meðal helstu viðskiptalanda Íslands, Grikklandi og Eistlandi. En hvað drífur hagvöxtinn áfram næstu ár?

„Það er fyrst og fremst einkaneyslan og fjárfesting. Það er töluvert mikil fjárfesting í kortunum, sérstaklega í ár. Þannig að það tvennt er að drífa hagvöxtinn áfram,“ segir Regína Bjarnadóttir, forstöðumaður greiningardeildar Arion banka.