Skaðabótamál gegn Glitnismönnum fellt niður

Skaðabótamál sem slitastjórn Glitnis höfðaði gegn fyrrverandi stjórnarmönnum og stjórnendum bankans var fellt niður í gær.

Alls hafði slitastjórnin stefnt níu manns, en þar á meðal voru Lárus Welding, fyrrverandi forstjóri Glitnis, Jón Ásgeir Jóhannesson, fyrrverandi stjórnarformaður FL Group, stærsta eiganda Glitnis, og Jón Sigurðsson, fyrrverandi forstjóri FL Group og stjórnarmaður í Glitni.

Stefndu munu hver um sig greiða málskostnað vegna rekstrar málsins fyrir dómi samkvæmt samkomulagi við slitastjórnina, fyrir utan einn hinna stefndu sem hyggst láta reyna á kostnaðinn fyrir dómi.

Skaðabótamálið snerist um 15 milljarða króna víkjandi lán sem Glitnir veiti Baugi um áramótin 2007-2008 til að taka þátt í hlutafjárútboði FL Group. Taldi slitastjórnin að tjón bankans vegna lánsins hefði numið 6,5 milljörðum króna.