Stefnir á að hlaupa maraþon í Chicago

Sigþór Jónsson var í síðustu viku ráðinn framkvæmdastjóri Íslenskra verðbréfa hf. Hann var áður framkvæmdastjóri Straums sjóða hf. og þar áður gegndi hann störfum framkvæmdastjóra Landsbréfa hf. Hann hefur einnig verið forstöðumaður sérhæfðra fjárfestinga hjá sjóðastýringarfyrirtækinu Stefni hf. og leiddi þar meðal annars uppbyggingu innlendra framtakssjóða félaganna.

Íslensk verðbréf eru með höfuðstöðvar á Akureyri. Spurður hvort til standi að flytja norður segir Sigþór að hann sé að minnsta kosti kominn með annan fótinn þangað. „Ég er fæddur og uppalinn á Húsavík,“ segir Sigþór og það geti því vel komið til greina að búa fyrir norðan.

„Íslensk verðbréf eru afar spennandi félag. Það rekur sögu sína allt til ársins 1987 og hefur á þessum tæplega þrjátíu árum náð sterkri stöðu í eignastýringu á íslenskum fjármálamarkaði,“ segir Sigþór, spurður um það hvað hafi heillað við nýja vinnu. Félagið sé farsællega rekið, annálað fyrir fagleg vinnubrögð og gott starfsfólk. „Það er ögrandi verkefni að byggja ofan á þennan trausta grunn. Á undanförnum árum hefur ríkt ákveðin óvissa um eignarhaldið á félaginu sem e.t.v. hefur haft einhver hamlandi áhrif. Þeirri óvissu hefur nú að hluta til verið eytt og um leið getur skapast þægilegra andrúmsloft til að nýta þau sóknartækifæri sem gefast. Íslensk verðbréf eru eitt sterkasta vörumerkið á eignastýringarmarkaðnum og við munum líta til ýmissa tækifæra sem sú staða skapar okkur,“ segir Sigþór. Í dag fer Straumur fjárfestingabanki hf. með 58 prósenta hlut í Íslenskum verðbréfum hf., í gegnum Íslenska eignastýringu ehf., og svo eiga lífeyrissjóðir um 40 prósent. Fyrirtækið var með 112 milljarða í eignastýringu í lok síðasta árs.

Helstu áhugamál Sigþórs eru ferðalög og hlaup og svo er hann að byrja hjólreiðar líka. „Mig dreymir svo um að taka þátt í Ironman fyrir fertugt. Það er markmiðið um þessar mundir en ég setti mér reyndar sama markmið á sínum tíma fyrir 35 ára afmælið – án þess að drífa mig af stað – hvað þá alla leið,“ segir Sigþór, sem verður fertugur á næsta ári. Svo reynir Sigþór að eiga sem mestan tíma með fjölskyldunni. Hann er trúlofaður Guðrúnu Lilju Tryggvadóttir sérfræðingi á eignastýringasviði Arion banka og eiga þau tvö lítil börn. Sigþór á líka eina dóttur búsetta í Noregi.

Sigþór stundaði flestar íþróttir á sínum yngri árum á Húsavík, spilaði fótbolta með Völsungi og nokkra leiki með meistaraflokknum. Hann segist þó ekki hafa verið landsliðsefni. Hann hefur hlaupið nokkur maraþon og er skráður í maraþon í Chicago í maí með eldri systur og mági sem eru búsett þar og stefnir á að taka þátt í WOW Cyclothon. „Ég er ansi gjarn á að skrá mig og aðra í alls kyns vitleysu, en það verður stundum minna um efndir, þó eitthvað,“ segir Sigþór.