Réðst á maka sinn fyrir framan lögreglu

Heimilisofbeldismál komu upp hjá Lögreglunni á höfuðborgarsvæðinu í nótt. Tilkynning hafði borist um rifrildi á milli sambýlisfólks og kom áfengi þar við sögu. Þegar lögregluþjónar komu á vettvang urðu átök á milli fólksins og réðist annar á hinn fyrir framan lögreglu.

Sá var handtekinn, samkvæmt dagbók lögreglunnar, og vistaður í fangageymslu. Þriggja ára barn var á heimilinu.

Í gærkvöldi var tilkynnt um mögulegan ölvaðan ökumann. Sá var á endanum stöðvaður, en hann reyndist ekki bara ölvaður, heldur var hann einnig undir áhrifum ýmissa fíkniefna og sviptur ökuréttindum. Barnsmóðir hans og þriggja ára barn voru einnig í bílnum samkvæmt lögreglu.

Nokkur umferðaróhöpp voru tilkynnt til lögreglun, en þó án þess að einhver slasaðist. Í dagbók lögreglunnar segir að betur hafi farið en á horfðist þegar bíl var ekið á þrjá kyrrstæða bíla, en kveikjan á óhappinu var mögulega veikindi.

Þónokkur ölvun

Þá var tilkynnt um eld í rusli við íbúðarhús rétt eftir klukkan fimm í gær. Íbúi og vegfarandi sem tilkynntu eldinn slökktu hann og ekki er vitað hver upptök hans voru. Eldurinn logaði í rusli sem lá utan við innganginn en lögreglan segir litla hættu hafa verið á ferð.

Þónokkur útköll voru vegna ölvaðs fólks og voru nokkrir útigangsmenn aðstoðaðir í ýmiss athvörf. Einn þáði þó gistingu á stöðinni. Samkvæmt lögreglunni var um dreng undir lögaldri að ræða í einu málanna. Hann sagðist eiga í sambandsvandamálum og því hefði hann stolist í áfengi. Málið var tilkynnt til Barnaverndar.

Þar að auki barst til lögreglu tilkynning um öldauðan mann sem reyndist frekar rænulítill þegar lögregluþjóna bar að garði. Ekki var hægt finna út hvar hann ætti heima og var ákveðið að vista hann í fangaklefa.