Þrír sparisjóðir voru reknir með tapi

Heildareignir þeirra sjö sparisjóða sem voru starfandi um síðastliðin áramót námu tæplega 58 milljörðum króna. Þetta kemur fram í skýrslu Seðlabanka Íslands um fjármálastöðugleika sem kynnt var í síðustu viku. Þau Már Guðmundsson seðlabankastjóri og Sigríður Benediktsdóttir, forstöðumaður fjármálastöðugleika, kynntu skýrsluna. Samkvæmt ársreikningum sparisjóðanna voru þrír sparisjóðir reknir með tapi á síðasta ári. Tap Sparisjóðs Vestmannaeyja var mest og nam rúmlega 957 milljónum króna og var eiginfjárhlutfall hans neikvætt sem nam 1,1% í árslok 2014. Sem kunnugt er hefur Landsbankinn nú tekið eignirnar yfir.

Tap Sparisjóðs Norðurlands var rúmlega 672 milljónir króna á síðasta ári og nam eiginfjárhlutfall sjóðsins í lok síðastliðins árs 8,2 prósentum sem er umfram átta prósenta lágmarkseiginfjárhlutfall fjármálafyrirtækja í lögum en undir kröfu Fjármálaeftirlitsins um eiginfjárhlutfall. Í skýrslunni segir að sparisjóðurinn vinni nú að því að tryggja að sjóðurinn standist þá eiginfjárkröfu sem Fjármálaeftirlitið gerir. Tap sjóðsins er meðal annars tilkomið vegna niðurfærslu á lánasafni Sparisjóðs Bolungarvíkur sem ekki lá fyrir við samrunann síðasta sumar.

Þriðji sparisjóðurinn sem var rekinn með tapi á síðasta ári er AFL Sparisjóður sem rekinn var með tæplega 189 milljóna króna tapi en helsta ástæðan var tæplega 454 milljónir króna sem færðar voru í afskriftarreikning á síðasta ári vegna þeirrar óvissu sem ríkir um mat á útlánum sjóðsins. Eiginfjárhlutfall sjóðsins nam í lok árs 2014 um 7,3 prósentum sem er lægra en heimilt er samkvæmt lögum. Ákveðið hefur verið að AFL Sparisjóður verði settur í söluferli.

Aðrir sparisjóðir voru reknir með hagnaði og eiginfjárhlutföll þeirra voru nokkuð umfram átta prósenta lágmarkseiginfjárhlutfallið. Stjórnir þriggja þessara sparisjóða hafa lagt til að greiddur verði út arður.

Á aðalfundi Sparisjóðs Norðfjarðar þann 14. apríl síðastliðinn var samþykkt tillaga stjórnar um breytingu á félagsformi sjóðsins í hlutafélag en tillagan fól í sér að Sparisjóði Norðfjarðar yrði slitið og stofnfjáreigendur eignuðust hlutabréf í Sparisjóði Austurlands hf.  sem tæki við öllum réttindum og skyldum Sparisjóðs Norðfjarðar miðað við 1. janúar 2015. Hlutafé Sparisjóðs Austurlands nemur rétt rúmlega 700 milljónum króna og skiptist á milli stofnfjáreigenda í sömu hlutföllum og stofnfé.