Innbrot í austurborginni í morgun

Snemma í morgun var tilkynnt um innbrot og þjófnað í kjallaraíbúð í austurborginni. Skartgripum, sjónvarpi og fleiri munum var stolið og er málið nú í rannsókn. Þetta kemur fram í tilkynningu frá lögreglu.

Samkvæmt skeytinu virðist hafa verið allróstusamt í morgunsárið. Þannig var um sex tilkynnt um líkamsárás í miðborginni. Ekki er vitað um geranda en hinn slasaði var fluttur á slysadeild til aðhlynningar og er hann ekki talinn alvarlega slasaður.

Þá var á sama tíma tilkynnt um mann sem sagður er hafa verið í mjög annarlegu ástandi í vesturbænum. Sá er grunaður um rúðubrot. „Maðurinn er vistaður í fangageymslu uns af honum rennur víman,“ segir í fréttatilkynningu lögreglunnar.

Einnig kemur fram í skeytinu að ökumaður hafi, rétt rúmlega klukkan 5 í morgun, verið stöðvaður af lögreglunni í Kópavogi – Breiðholti, grunaður um ölvun við akstur og að auki vera valdur af umferðaróhappi. Ökumanni var sleppt að lokinni sýnatöku.