Góð þátttaka í bréfamaraþoni

Bubbi söng valinkunn lög fyrir fullu húsi á Bréfamaraþoni Íslandsdeildar Amnesty International í dag. Fram kemur í tilkynningu frá samtökunum að hátt í annað hundrað manns lögðu leið sína á skrifstofu samtakanna, hlýddu á baráttusöngva Bubba og skrifuðu bréf til stjórnvalda um víða veröld sem brjóta gróflega á mannréttindum borgara sinna.

Þetta er ekki í fyrsta sinn sem Bubbi Morthens tileinkar söng sinn mannréttindabaráttu Amnesty International en árið 1987 gaf hann út metsöluplötuna Dögun sem hann tileinkaði samtökunum í tilefni af 40 ára afmæli Mannréttindayfirlýsingar Sameinuðu þjóðanna.

Bréfamaraþon Amnesty International er einn stærsti mannréttindaviðburður heims sem fram fer árlega í kringum 10. desember á alþjóðlegum mannréttindadegi. Þá koma hundruð þúsunda saman og skrifa bréf til stjórnvalda sem brjóta mannréttindi og krefja stjórnvöld um umbætur. Margir senda einnig stuðningskveðjur til þolenda brotanna. „Kveðjurnar veita þolendum mannréttindabrota styrk og vissu um að umheimurinn hafi ekki gleymt þeim,“ segir í tilkynningunni.

12 mál í ár

Á bréfamaraþoni samtakanna í ár er hægt bregðast við vegna 12 mála sem samtökin telja að þurfi á athygli að halda. Meðal þeirra er mál Albert Woodfox sem hefur setið í fangelsi í Louisiana í Bandaríkjunum í 43 ár, þar af 40 ár í einangrun.

„Engar áþreifanlegar sannanir tengja Woodfox við glæpinn sem hann er ákærður fyrir,“ segir í bréfi Amnesty.

Búrkína Fasó er einnig í brennidepli bréfamaraþonsins í ár en þar eru þúsundir ungra stúlkna þvingaðar í hjónaband á hverju ári. Í El Salvador er einnig brotið gróflega á mannréttindum kvenna og stúlkna þar sem bann ríkir við fóstureyðingum í landinu.

Mál Teodora del Carmen verður sérstaklega tekið fyrir en hún fæddi andvana barn árið 2007 og var í kjölfarið handtekin og dæmd í 30 ára fangelsi fyrir morð að yfirlögðu ráði. Allir þessir þolendur mannréttindabrota þurfa sárlega á aðgerðum Íslendinga að halda.

„Það kann að vera auðvelt fyrir stjórnvöld að hunsa eitt bréf en þegar milljónir slíkra bréfa berast er erfitt að líta undan. Bréfin bera árangur. Bréfin bjarga lífi“