Gefa alla sölu dagsins til góðgerðarmála

Verslunarkeðjan Bestseller ætlar að gefa allan söluágóða verslana fyrirtækisins í dag til góðgerðarmála. Það þýðir að hver einasta króna sem viðskiptavinir verslana Bestseller reiða fram endar hjá góðgerðasamtökum.

Helmingur alls fés fer til Krabbameinsfélags Íslands en hinn helmingurinn skiptist á milli þriggja alþjóðlegra hjálparsamtaka; UNICEF, GAIN og Barnaheilla.

Bestseller rekur verslanirnar Vila, Jack & Jones, Name it, Selected og Vero Moda sem verða opnar í 12 klukkustundir í dag, frá 9 í morgun til 21 í kvöld. Fyrir þá sem ekki eru staddir í höfuðborginni verður hægt að versla í gegnum síma.



Átakið er í öllum verslunum Bestseller í heiminum en yfir 3.000 verslanir eru starfræktar í 38 mismunandi löndum. Hér á landi má finna 11 Bestseller verslanir  en þær eru allar staðsettar í Kringlunni eða Smáralind.



„Bestseller er að gera þetta í tilefni 40 ára afmælis fyrirtækisins,“ segir Lovísa Pálmadóttir, markaðsstjóri fyrirtækisins, í Bítinu á Bylgjunni á morgun. „Við erum ekki að tala um álagninguna heldur söluna.“

Ragnheiður Haraldsdóttir, framkvæmdarstjóri Krabbameinsfélagsins, sagði í sama þætti að fjármunirnir sem safnast í dag í verslunum Bestseller verði notaðir til að efla upplýsingagjöf til þeirra sem leita til félagsins.



„Við erum búin að ákveða að setja þetta í verkefni sem gera okkur kleift að svara með skilmerkilegri hætti spurningum sjúklinga og aðstandenda sem vilja leita til okkar,“ segir hún. 



„Við ætlum að efla símsvörun sem við höfum verið með og bæta við miklum betri aðgangi þannig að fólk geti sent spurningar sínar bæði nótt sem dag og þá verða svörin öflugir og viðameiri,“ segir Ragnheiður.



Hún segir að starfsmenn Krabbameinsfélagsins hafi orðið orðlaus þegar Bestseller leitaði til þeirra og kynnti verkefnið. „Ég verð ennþá hálf orðlaus þegar ég hitti þetta fólk og þetta er stórkostlegt tækifæri fyrir okkur til þess að efla þessa mikilvægu þjónustu,“ segir Ragnheiður.