Vantaði eina og hálfa tommu á Dominos pítsuna

„Þetta er eitthvað sem getur gerst en á ekki að gerast,“ segir Anna Fríða Gísladóttir markaðsfulltrúi Domino's Pizza á Íslandi í samtali við Vísi. Tilefnið er mynd sem viðskiptavinur staðarins birtir á Facebook-vegg Domino's þar sem stór pítsa er aðeins þrettán tommur. Að sögn Önnu hefur stærðinni á pítsunum ekki verið breytt í fjölda ára, þær hvorki minnkaðar né stækkaðar.

Sá hafði pantað tvennutilboð og fannst pítsan vera í minni kantinum svo hann vippaði út málbandinu. „Þið segið reyndar alltaf bara „stór pítsa“ en mér þykir þá sérstakt að stór pítsa sé rétt um stærri en 12“ mið-pítsa hjá samkeppnisaðilum ykkar,“ skrifar hinn óánægði viðskiptavinur á vegg fyrirtækisins.

„Ég hef lengi haft grun um að pítsurnar frá ykkur séu minni en þær ættu að vera. Þær voru allavega alltaf fimmtán tommur," fylgir einnig sögunni.

Pítsan á að fylla út í pítsakassann

„Þessi viðskiptavinur hefur fengið pítsu sem stenst ekki þær gæðakröfur sem við gerum. Allar deigkúlurnar eru jafnþungar og stór pítsa á að vera 14,5“. Þarna hefur eitthvað misfarist þegar verið var að koma deiginu fyrir á plötunni eða eitthvað klikkað í bakstri. Okkur þykir það miður,“ segir Anna. 

Á matseðli Domino's er nákvæm stærð afurðanna ekki tilgreind heldur er aðeins boðið upp á stærðirnar lítil, mið, pönnu og stór. Í hverri stærð fyrir sig eiga pítsurnar að ná alveg kanta á milli á pítsakassanum. Í tilfelli litlu pítsanna er kassinn átta tommur, 11,5 í miðstærð og tólf í pönnupítsu. 

„Við erum með mjög skýra verkferla um hvernig þetta á að vera hjá okkur, hve stórar pítsurnar skulu vera og hve mikið álegg fer á hverja og eina. Okkur er mjög annt um viðskiptavini okkar og við höfum ekkert að fela. Allar pítsurnar í auglýsingum frá okkur eru gerðar af okkar starfsfólki og við brúkum ekki nein myndvinnsluforrit til að láta þær líta betur út. En það getur alltaf eitthvað farið úrskeiðis í framleiðslunni.“ 

Að lokum segir Anna Fríða að hinum óánægða viðskiptavini verði bættur skaðinn og vonandi verði allir sáttir að lokum.