Hafa sýnt tvær heimildarmyndir kostaðar af umfjöllunarefni myndanna

RÚV sendi í gær út heimildarmynd um Búrfellsvirkjun sem framleidd var af Landsvirkjun. Ekki kom fram í neinum dagskrárkynningum eða sjálfri dagskránni að myndin hafi verið framleidd af eiganda virkjunarinnar sem fjallað var um. 

Þetta er ekki einsdæmi því í síðasta mánuði sýndi RÚV heimildarmynd um garðyrkjuræktun á Íslandi sem framleidd var í samvinnu við Samtök garðyrkjubænda. Báðar myndirnar eiga það sameiginlegt að hafa sýnt umfjöllunarefni sín í mjög jákvæðu ljósi.

Hefð að segja frá í kreditlista

Skarphéðinn Guðmundsson, dagskrárstjóri Sjónvarpsins, segir aðspurður um af hverju þess hafi hvergi verið getið í dagskrárkynningum RÚV að myndirnar tvær hafi verið kostaðar, að hluta hið minnsta, af umfjöllunarefninu sjálfu að hefð hafi skapast fyrir því að greina frá upplýsingum sem þessum í kreditlista dagskrárliðanna. 

„Við meðhöndluðum umrædda heimildarmynd um Búrfellsvirkjun eins og allar aðrar heimildarmyndir og þáttaraðir sem okkur bjóðast til kaupa með sama faglega hættinum, einnig þær sem hafa verið fjármagnaðar eða hlotið styrk, að hluta eða öllu leyti frá fyrirtækjum eða stofnunum,“ segir hann í skriflegu svari til fréttastofu.

„Við ákvörðun á kaup á sýningarrétti og val á efni til sýningar metum við mjög vandlega hvort það eigi erindi á RÚV, hvort það uppfyllti þær kröfur sem við gerum um nálgun og efnistök – og teljum að myndin um Búrfellsvirkjum hafi gert það,“ segir hann.

RÚV greiddi fyrir sýningarrétt á kvikmyndinni um Búrfellsvirkjun og garðyrkjuþáttinn. 

Ekki algengt

Skarphéðinn segir að það heyri til undantekninga að myndir á RÚV séu framleiddar eða fjármagnaðar af umfjöllunarefni sínu. „En kemur þó óhjákvæmilega fyrir hjá RÚV eins og öðrum sjónvarpsstöðvum að keypt er efni til sýningar af sjálfstæðum framleiðendum sem að hluta er fjármagnað af fyrirtækjum og/eða stofnunum og förum þá ætíð fram á að þess sé getið og þá jafnan í kreditlista,“ segir hann.

„Það efni er þá skoðað og metið sérstaklega með það í huga.“