Marple-málið: Frammíköll verjenda í vitnaleiðslum

Skýrslutökum í Marple-málinu lauk í Héraðsdómi Reykjavíkur í dag. Séu sakborningar teknir með í reikninginn voru vel á þriðja tug manns yfirheyrðir í dómsal vegna málsins. Þeirra á meðal voru fyrrum starfsmenn Kaupþings og lögreglumenn sem komu að rannsókn málsins.

Vitnaleiðslur í dag hófust þar sem þeim sleppti í gær. Fyrir dóminn kom fólk sem starfaði í endurskoðun, bókhaldi og innra eftirliti auk framkvæmdastjóra og forstöðumanna í fjárstýringu bankans á þeim tíma sem hin meintu brot áttu sér stað.

Saksóknari hefur varið talsverðum tíma hingað til í að spyrja um samninga sem tengjast milljarðafærslum frá Kaupþingi á Íslandi til Kaupþings í Lúxemborg en þaðan fóru peningarnir til Marple. Ákærði Hreiðar Már Sigurðsson, fyrrverandi forstjóri Kaupþings, staðhæfði að samningur hefði verið gerður og ákærða Guðný Arna Sveinsdóttir, fyrrverandi fjármálastjóri bankans, að hún hefði séð samninginn. Samningarnir hafa hins vegar aldrei fundist í tölvukerfum bankans.

Þrír starfsmenn sem leituðu að samningunum að beiðni sérstaks saksóknara báru vitni í dag og upplýstu um hvernig leitinni hefði verið háttað og ljóst að skjölin væri hvergi að finna á rafrænum drifum bankans. Önnur vitni voru mörg hver spurð hvort slík skjöl hefðu ekki átt að enda inn á drifunum eða hvort slíkar upplýsingar hefðu ekki átt að koma í gegnum þeirra deildir. Slíku var ýmist svarað á þann veg að svo hefði átt að vera eða að fólk hefði ekki vitneskju um slíkt.

Hörður Felix Harðarson, verjandi Hreiðars Más, spurði starfsmennina að sem leituðu í drifunum hvort leitað hefði verið í gögnum sem voru áður á skrifstofu forstjórans. Þeir sögðu að það hefði ekki verið gert. Aðra starfsmenn spurði hann hvort þeir hefðu haft almenna vitneskju um samninga eða störf forstjórans almennt. Svaraði fólk því að svo hefði ekki verið.

„Veit ekkert um atvik þessa máls“

Það kom fyrir oftar en einu sinni og oftar en tvisvar að verjendur, þá aðallega Sigurður G. Guðjónsson en hann ver Guðný Örnu í málinu, gerðu athugasemdir við spurningar Arnþrúðar Þórarinsdóttur saksóknara.

„Hann á að gefa vitnisburð um atvik málsins en ekki gefa álit á hinu og þessu,“ sagði Sigurður er Guðmundur Þórður Guðmundsson, fyrrverandi framkvæmdastjóri fjárstýringar Kaupþings á Íslandi, bar vitni.

Síðar í vitnaleiðslunni svaraði Guðmundur spurningu Arnþrúðar á þann veg að hann gæti aðeins sagt til um hvernig málum hefði verið háttað innanhúss hjá Kaupþingi á Íslandi en ekki í öðrum útibúum bankans.

„Dómari, er ekki rétt að hætta því að spyrja ef þetta og hefði hitt spurningum?“ spurði Sigurður og bætti við að Guðmundur væri kominn sem vitni en ekki til að gefa sérfræðiálit. „Mér sýnist hann ekkert vita um atvik þessa sérstaka máls.“

Frystingin haft gífurleg íþyngjandi áhrif

Katrín Þorvaldsdóttir, systir Skúla Þorvaldssonar sem er ákærður í málinu, gaf einnig skýrslu fyrir dómnum. Katrín átti hlut í tveimur félögum með Skúla en eigur hans voru kyrrsettar á meðan rannsókn málsins stóð og krefst ákæruvaldið upptöku á stórum hluta þeirra. Þar á meðal er félagið Holt Holding sem systkinin stofnuðu um aldamótin eftir að þau seldu Síld og fisk.

„Peningarnir í Holt Holding eru arður af þeim eignum sem við settum í það við stofnun þess,“ segir Katrín en samkvæmt henni var nettó eiginstaða félagsins um sextíu milljónir evra í upphafi árs 2008.

„Krafa um upptöku á eignunum er óskiljanleg með öllu. Þetta hefur haft gífurleg áhrif á stöðu mína. Ég þurfti til að mynda að greiða auðlegðarskatt heima á Íslandi vegna eignanna en gat ekki nýtt þær að nokkru leiti. Sá hluti var því alfarið greiddur úr eigin vasa. Frystingin hefur haft töluverð íþyngjandi áhrif fyrir mig,“ sagði Katrín.

Málflutningur sækjenda og verjenda hefst í fyrramálið klukkan 08.30.