Viðræðum sjómanna og útgerðarmanna slitið

Viðræðunum á milli samtaka sjómanna og Samtaka fyrirtækja í sjávarútvegi var slitið á fundi hjá ríkissáttasemjara í dag. Kjarasamningar á milli sjómanna og FSF hafa verið lausir frá 1. janúar 2011.

Í tilkynningu Farmanna- og fiskimannasambandi Íslands, Sjómannasambandi Íslands, Verkalýðsfélagi Vestfirðinga og VM- Félagi vélstjóra og málmtæknimanna, segir að enginn vilji sé hjá SFS til að ljúka gerða kjarasamnings.

„Þrátt fyrir að afkoma sjávarútvegsins hafi verið með því besta sem gerist undanfarin ár er algjört viljaleysi hjá samtökum útgerðarmanna að ljúka gerð kjarasamninga við sjómenn. Á fundum nú á haustdögum hafa samtök útgerðarmanna svo sannarlega sýnt áhugaleysi sitt í verki,“ segir í tilkynningunni.

Ennfremur segir að þeim málum sem fulltrúar sjómanna hafi lagt fram til lausnar deilunni hafi ýmist ekki verið svarað eða svarað með útúrsnúningum og rangtúlkunum.

„Jafnvel hafa fulltrúar útgerðarinnar gengið svo langt að bæta í kröfur sínar um skerðingu á kjörum sjómanna. Með framkomu sinni sýna samtök útgerðarmanna starfsfólki sínu sem starfar á skipum þeirra mikla lítilsvirðingu. Þetta gerist á sama tíma og hagnaður, á öllu tímabilinu sem samningar hafa verið lausir, hefur aldrei í sögu atvinnugreinarinnar verið jafn mikill. Enda bera arðgreiðslur til eigenda sjávarútvegsfyrirtækjanna undanfarin ár þess merki að vel gangi hjá þeim.“