Bjarki Gunnlaugsson gjaldþrota

Skagamaðurinn og knattspyrnumaðurinn Bjarki Gunnlaugsson hefur verið úrskurðaður gjaldþrota. Bú hans var tekið til gjaldþrotaskipta þann 15. júní og skipaði Héraðsdómur Reykjavíkur Hildi Sólveigu Pétursdóttur sem skiptastjóra.

Bjarki og Arnar tvíburabróðir hans hafa verið umfangsmiklir í viðskiptum allt frá því að atvinnuferli þeirra í knattspyrnu lauk. Þeir hafa meðal annars fjárfest í fasteignafélögum, veitingastöðum og voru með áform um að hefja rekstur spilavítis hér á landi.

Bjarki er einn sigursælasti knattspyrnumaður Íslands hér á landi en hann varð Íslandsmeistari með ÍA, KR og FH. Hann spilaði lengi sem atvinnumaður erlendis. Fyrst fóru þeir bræðurnir ungir að árum til Feyenoord í Hollandi en síðar spilaði hann með liðum í Þýskalandi, Noregi og Englandi áður en hann lauk ferlinum sem Íslandsmeistari með FH árið 2012.