Tækni Dohop notuð í brautryðjandi þjónustu á Gatwick flugvelli

Ný brautryðjandi þjónusta sem Gatwick flugvöllurinn í London býður nú upp byggir á tækni íslensku flugleitarvélarinnar Dohop. GatwickConnects, sem fór í loftið á föstudaginnn tryggir farþega gegn seinkunum og aflýstum flugum þegar farþegar nýta sér tengiflug í gegnum flugvöllinn. Kostnaður þjónustunnar er 27,5 pund, jafnvirði 5400 íslenskum krónum. Innifalið í henni er nýr flugmiði á áfangastað ef flug fellur niður, fyrir engan aukakostnað, auk matar og hótelherbergis ef þörf er á.

Þjónustan nýtir tækni frá Dohop. „Það sem gerir Dohop leitina og leitarniðurstöðurnar einstakar er að við getum fundið „self-connect“ lausnir. Þegar þú leitar að áfangastað þangað sem er ekki beint flug, þá finnum við lausnir þar sem þú getur keypt tvo flugmiða hjá mismunandi flugfélögum til þess að komast á áfangastað á lægra verði. Hins vegar eru þeir ekki tengdir þannig að ef annað flugið er seint þá lendirðu í því að þú þarft að bóka þig sjálfur upp á nýtt í hitt flugið.“ segir Davíð Gunnarsson, framkvæmdastjóri Dohop. Með GatwickConnects eru miðarnir þó tengdir og farþeginn tryggður áfram.

Davíð segir þjónustuna fara vel af stað, fyrsta bókunin var á laugardaginn og hefur þeim farið fjölgandi síðan þá. Flugfélögin sem taka þátt til að byrja með eru WOW Air, Norwegian Air og easyJet. „Mögulegar tengileiðir með þessum flugfélögum eru mörg þúsund, en við erum bara að bjóða upp á 20 til 30 leiðir núna,“ segir Davíð. Hann býst þó fastlega við að fleiri flugfélög munu bætast í þjónustuna og að flugleiðum í boði muni fjölga. Hann bendir á að nú þegar tengja margir Íslendingar sig í gegnum Gatwick með WOW Air til London og svo áfram með easyJet. Nú geta þeir nýtt sér þessa þjónustu.

Nýja þjónustan hefur nú þegar hlotið mikla umfjöllun í breskum fjölmiðlum, meðal annars hjá the Telegraph og the Independent. Þar segir meðal annars að með nýju þjónustunni geti farþegar sparað allt að 900 pundum, jafnvirði 177 þúsund króna.