Sveinarnir hafa komið og hitt börnin í 27 ár

„Alvöru jólasveinarnir koma á hverjum degi til okkar fram að jólum. Þeir koma alltaf klukkan ellefu þegar þeir eru búnir að gefa í skóinn,“ segir Helga Vollertsen, safnfræðslufulltrúi á Þjóðminjasafni Íslands en gömlu íslensku jólasveinarnir heimsækja safnið á hverjum degi síðustu þrettán daga fyrir jól, einn í einu.

Árið 1988 bauð Þjóðminjasafn Íslands jólasveinunum í fyrsta skipti formlega í heimsókn fyrir jólin. Síðan þá hafa þeir verið fastagestir í desember og heimsækja nú safnið 27. árið í röð.

„Í dag kemur Stúfur til okkur en í gær kom Giljagaur. Þeir eru rosalega skemmtilegir allir og segja börnum og foreldrum þeirra skemmtilegar sögur af sér. Þá útskýra þeir líka hvaðan nöfn þeirra eru komin,“ segir Helga og bætir því við að jólasveinarnir eigi frekar erfitt með að átta sig á tæknivæddri nútímaveröld og finnist gott að koma í Þjóðminjasafnið.

„Stekkjastaur útskýrði fyrir börnunum hvað hann væri hissa að sjá mjólk í kassa á Íslandi í dag. Áður fyrr reyndi hann oft að sjúga ærnar í fjárhúsunum hjá bændum til að fá mjólk.“

Að sögn Helgu koma um þrjú hundruð manns á hverjum degi í Þjóðminjasafnið í þeim tilgangi að hitta jólasveinana. Hún býst ekki við öðru en að aðsóknin haldist fram að jólum.

„Nú þegar þetta hefur staðið yfir í 27 ár þá er gaman að fylgjast með foreldrum sem komu í Þjóðminjasafnið að hitta jólasveinana sem börn, koma með börnin sín að hitta þá. Fólki finnst þetta greinilega mjög skemmtilegt,“ segir Helga.

Jólasveinarnir eru klæddir í þjóðlegu fötunum sínum en ekki í rauðu sparifötunum. Að sögn starfsfólks reyna þeir að krækja sér í það sem þá langar helst í enda eiga þeir það enn til að vera svolítið þjófóttir þó þeir séu hin vænstu skinn.