Nokkuð um umferðaróhöpp í dag

Tvö umferðaróhöpp áttu sér stað í Grafarvogi síðdegis með skömmu millibili. Hið fyrra á gatnamótunum við Hallsveg klukkan rúmlega fjögur þegar tveir bílar skullu saman. Lögregla og sjúkrabíll voru send á vettvang, en engan sakaði alvarlega. Þá hafnaði bifreið utanvega á Höfðabakka um hálftíma síðar, en ökumann sakaði ekki alvarlega.



Við Litlatún í Garðabæ varð jafnframt harður árekstur þegar fólksbíll og jepplingur lentu saman með þeim afleiðingum að sá síðarnefndi fór á hliðina. Samkvæmt upplýsingum frá slökkviliðinu á höfuðborgarsvæðinu urðu ekki alvarleg slys á fólki.

Þá varð umferðaróhapp á Nýbýlavegi í Kópavogi klukkan hálf fimm í dag, samkvæmt dagbók lögreglu, en frekari upplýsingar liggja ekki fyrir að svo stöddu.