Íslenskur tölvuleikur kemur út á Steam í mánuðinum

Framleiðendur tölvuleiksins Aaru‘s Awakening, sem beðið hefur verið eftir með talsverðri eftirvæntingu, tilkynntu um það fyrir stuttu að leikurinn kemur út þann 24. febrúar næstkomandi.

Notendur dreifingaraðilans Steam munu þá geta sótt leikinn fyrir PC, Mac og Linux-tölvur en von er á tilkynningu brátt um hvenær leikurinn verður gefinn út fyrir leikjatölvurnar Playstation og X-Box.

Sjá einnig: Gefa út 140 milljón króna listaverk með haustinu

Það er íslenska nýsköpunarfyrirtækið Lumenox, staðsett í Hafnarfirði, sem hefur unnið að gerð leiksins í um þrjú ár. Leikurinn verður í tvívídd og er umhverfið í honum handteiknað, sem þykir harla óvenjulegt.

Í tilkynningu Lumenox segir að leikurinn verði seldur á fimmtán prósent afslætti í gegnum Steam fyrstu vikuna eftir að hann kemur út.