Það stefnir í seinasta Ljómann í kvöld

Undanfarin ár hafa 23 drengir af Seltjarnarnesi komið sér saman á gamlárskvöld og haldið heljarinnar partý sem nefnist Ljóminn. Með árunum hefur áramótafögnuðurinn stækkað og nú síðustu tvö ár verið haldið í íþróttaheimilinu á nesinu.

Partýið er ætlað fyrir vini þeirra og vandamenn en hægt er þó að bjóða gestum með sér. Allir þeir sem ætla sér inn í partýið verða að vera á gestalista á facebook.

„Þetta hefur gengið mjög vel fyrir sig seinustu ár, mögulega út af því að við reynum að hafa þetta lokað partý. Það eru allir bara komnir saman til að skemmta sér,“ segir Einar Rafn Ingimarsson einn skipuleggjenda Ljómans en þeir eiga von á um 1.500 manns í ár.

 

Þeir félagarnir byrjuðu með Ljómann árið 2009, þá í yfirgefinni verksmiðju. „Okkur þóknaðist þetta húsnæði og við ákváðum að henda í partý og bjóða öllum vinum okkar. Eftir það hefur þetta undið upp á sig. Annað árið var þetta haldið í tómu húsnæði í Reykjavík og svo fengum við Mjölnishúsið. Áður en við færðum okkur í íþróttahúsið héldum við þetta líka eitt skipti í Iðnó.“



Það gæti stefnt í að þetta gamlárskvöld verði það seinasta þar sem þessi vinahópur heldur Ljómann. „Mikil vinna er lögð í að halda þetta og við höfum rætt það að þetta gæti verið seinasti Ljóminn okkar. Það væri þó synd að leggja þessa hátíð niður og við værum alveg tilbúnir að leyfa yngri kynslóðinni að taka við keflinu. Það er eiginlega nauðsynlegt að það yrðu einhverjir sem við þekkjum og eru af nesinu eða vesturbænum þar sem hagnaðurinn af kvöldinu rennur beint til Gróttu,“ segir Einar en þeir félagarnir verða þrítugir á næsta ári.