Jennifer Lawrence hatar gamlárskvöld

Óskarsverðlaunahafinn Jennifer Lawrence hatar gamlársdagskvöld. Þetta sagði hún í þætti breska spjallþáttastjórnandans Graham Norton nýlega og komu ummælin mörgum í opna skjöldu, að líf svona frægrar leikkonu geti verið alveg jafn leiðinlegt og hjá venjulegu fólki.

„Ég hata það,“ svaraði Lawrence þegar hún var rukkuð um skoðanir á gamlárskvöldi.  Vildi hún meina að væntingar flestra til gamlárskvöld séu langt umfram öll skynsemismörk og því verði svo margir fyrir vonbrigðum.

„Það ætla allir að skemmta sér svo vel en verða svo fyrir vonbrigðum. Ég ætla ekki að gera neitt, mögulega ef eitthvað óvænt kemur upp á, en ég enda oftast drukkin og vonsvikin,“ sagði Lawrence og bætti við: „Drukkin og vonsvikin ætti að vera heitið á ævisögu minni.“