Fá spil önnur en fjárlögin á hendi ríkisstjórnar

Ríkisstjórnin hefur úr litlu að spila fyrir utan liði í fjárlagafrumvarpi sínu í togstreitu sinni við stjórnarandstöðuna um lok þingfunda fyrir jól. Forseti Alþingis hefur ákveðið að fundað verði þriðja kvöldið í röð um fjárlagafrumvarpið en engar líkur eru á að umræðunni ljúki í kvöld.

Yfirleitt hefur ríkisstjórn hverju sinni nokkurn fjölda mála til afgreiðslu fyrir jólaleyfi sem hún getur hliðrað til með í samningum sínum við stjórnarandstöðuna. Nú er staðan hins vegar þannig að ríkisstjórnin hefur nánast engin önnur mál að semja um en fjárlagafrumvarpið og þar er stjórnarandstaðan með kröfur.

Efst á lista stjórnarandstöðunnar er að auka framlög til Landspítalans, samræma greiðslur lífeyris viðþróun launa á vinnumarkaði og að samþykkt verði lög sem ógilda lækkun útvarpsgjaldsins á næsta ári. En frumvarp menntamálaráðherra um þetta var ekki afgreitt út úr ríkisstjórn á fundi hennar í morgun þar sem það hefur setið fast í þrjár vikur.

En Einari K. Guðfinssyni, forseta þingsins, er mál að annarri umræðu fjárlaga, sem staðið hefur fram á nótt undanfarna tvo daga, ljúki á þriðja kvöld- eða næturfundinum í dag.

Steingrímur J. Sigfússon sem lengst hefur setið á þingi núverandi þingmanna sagði ríkisstjórnina mega þakka fyrir ítarlega umræðu um fjárlögin „Enda var hún greinilega engan veginn tilbúin með afgreiðslu þessara mála. Það var ekki nóg að meirihluti fjárlaganefndar tíu, ellefu daga framúr eigin starfsáætlun. Heldur dugði það ekki einu sinni til því það dúkka upp milljarðarnir hér og milljarðarnir þar sem gleymdist að taka inn í fjárlögin,“ sagði Steingrímur.

Þá hafi ekki verið hefð fyrir því að funda á Alþingi tvær nætur í röð.

„Það væri þá þannig að það væri ekki nema önnur hver nótt. Nú hefur hæstvirtur forseti brotið í blað og er að bilja um heimild til að halda þriðja næturfundinn í röð og það á föstudagskvöldi,“ sagði Steingrímur.

Einar forseti minnti á aðra hefð í þingstörfum.

„Það er rétt að rifja það þá upp að sú hefð var líka til staðar varðandi aðra umræðu fjárlaga að henni lauk nánast alltaf á sama sólarhringnum og hún hófst,“ sagði Einar.

En eftir athugasemdir utan úr sal bætti hann við: „Nánast alltaf, það er rétt, nánast alltaf.“ Undantekningar væru þar ekki til fyrirmyndar.

En Helgi Hjörvar þingflokksformaður Samfylkingarinnar minnti einmitt á slíka undantekningu frá tíð fyrri ríkisstjórnar. „Hér á Alþingi byggjum við á þeim hefðum sem forseti Alþingis markar. Líka þeim sem hann sem þingmaður markaði hér haustið 2012 með 51 klukkustundar umræðu um fjárlagafrumvarpið þá,“ sagði Helgi.