Ánægð með jákvæða umfjöllun og hækka opinbera styrki

„Þetta eru stór skref að fylla en við erum tilbúin í að gera eins vel og við getum,“ segir Stefán Bogi Sveinsson, eigandi Austurfréttar, sem um áramót tekur við sem undirverktaki hjá sjónvarpsstöðinni N4 við gerð þátta um Austurland. Þar leysir Austurfrétt af hólmi sjónvarpsmanninn Gísla Sigurgeirsson sem hættir vegna aldurs.

Nafni þáttanna verður breytt úr Glettum í Að austan en áfram er áhersla á jákvæða umfjöllun um Austurland, líkt og gert er í sambærilegum sjónvarpsþáttum sem N4 framleiðir um Norðurland og Suðurland með styrkjum frá fyrirtækjum og sveitarfélögum þar.

Bæði Fjarðabyggð og Fljótsdalshérað hafa samþykkt áframhaldandi og hærri fjárstyrki vegna framleiðslu sjónvarpsþáttanna, sem verða 40 á næsta ári. „Reynslan af þáttagerðinni er almennt góð,“ segir í minnisblaði sem lagt var fyrir þegar bæjarráð Fjarðabyggðar samþykkti einnar milljónar króna styrkveitingu.

„Við höfum verið að biðja menn um að halda áfram og helst bæta við því þetta hefur kannski ekki alveg náð að standa undir sér. Það virðist vera allur vilji til að leggja þessu lið,“ segir Stefán sem kveður sveitar­félögin eystra nú beðin um samtals á fjórðu milljón króna. Viðræður séu einnig um áframhaldandi framleiðslustyrki frá fyrirtækjum. Auglýsingatekjur renni hins vegar til N4.

Í ljósi þess sem getið er í samningum um jákvæðni er Stefán spurður hvort sveitarfélögin séu með ­styrkjum sínum í raun að kaupa jákvæða umfjöllun fjölmiðla. Stefán, sem sjálfur er bæjarfulltrúi á Fljótsdalshéraði þar sem bæjarráðið samþykkti nýjan styrk á meðan hann vék af fundinum, segir mjög mikilvægt að gera greinarmun á fréttum og  dægurmálaumfjöllun.

„N4 hefur haft mjög skýra stefnu um að hún sé ekki fréttastöð, þar er fjallað um dægurmál. Það leiðir af sjálfu sér að þá eru menn auðvitað að fjalla um hluti sem eru í gangi, jákvæða hluti. Þannig að þarna eru menn í sveitarfélögunum að tryggja að það sé umfjöllun um hluti sem eru í gangi á svæðunum. Sveitar­félögin hafa í sjálfu sér ekkert vald um það hvað er tekið til umfjöllunar,“ segir Stefán.

Ritstjóri Austurfréttar og blaðamaður þaðan verða á meðal þeirra sem vinna að þáttagerðinni. Austurfrétt er bæði með fréttavef og blað. „Það eru fréttir og þá eru það önnur lögmál sem eru þar að baki,“ segir Stefán Bogi Sveinsson.