Karlar bara fimmtungur kennara

Af félögum Kennarasambands Íslands (KÍ) er aðeins tæpur fimmtungur karlar og fer fækkandi samkvæmt úttekt hagfræðings KÍ. Fjallað er um málið í nýjasta tölublaði Skólavörðunnar, tímarits KÍ.

Fram kemur að körlum hafi fækkað hratt í kennarastétt og að konur séu í meirihluta í öllum aðildarfélögum KÍ. „Hlutfallið er jafnast innan framhaldsskólans þar sem „aðeins“ sex kennarar af hverjum tíu eru konur en langlægst er hlutfallið í leikskólanum,“ segir í Skólavörðunni, en rúmlega 97 prósent félagsmanna Félags stjórnenda leikskóla eru konur. „Þessi mynd hefur verið að breytast hægt og rólega síðustu ár og segja má að ákveðin kaflaskil hafi orðið árið 2006 þegar konur urðu í fyrsta skipti fjölmennari en karlar í kennarahópi framhaldsskólans.“



Þá kemur fram að á mjög stuttum tíma hafi orðið miklar breytingar á kynjahlutfalli meðal kennaranema, bæði í Háskóla Íslands og Háskólanum á Akureyri. Konur hafi lengi verið í meirihluta nema, en á síðustu árum hafi kynjahallinn aukist hratt meðal þeirra sem sækja sér réttindi til að kenna í framhaldsskólum. „Um aldamótin voru karlar þar í meirihluta (um 53 prósent) en í fyrra, fjórtán árum síðar, voru karlmenn aðeins fjórðungur hópsins.“

Samkvæmt spá Odds S. Jakobssonar, hagfræðings KÍ, fer hlutfall karla í hópi félagsfólks KÍ úr 19,6 prósentum nú í 17,3 prósent eftir fimm ár og í 15,9 prósent eftir tíu ár. „Í raun má segja að í mörgum tilfellum hætti eldri karlmenn störfum og í stað þeirra verði ráðnar ungar konur.“ Hröðust er breytingin sögð meðal kennara og stjórnenda framhaldsskóla, en í dag eru 42 prósent þeirra karlar. Hlutfallið er sagt fara í 35 prósent eftir fimm ár og niður í 25 prósent 2030.

Haft er eftir Aðalheiði Steingrímsdóttur, varaformanni KÍ, að við blasi brýn nýliðunarþörf í stéttinni. „Upp gæti komið alvarlegur kennaraskortur ef ekki tekst að mennta nógu marga kennara til starfa,“ segir hún. Þá er haft eftir Guðrúnu Jóhannsdóttur, formanni Jafnréttisnefndar KÍ, að gangi þróunin eftir gætu nemendur í skólakerfi framtíðar jafnvel mátt eiga von á að hafa enga karlkyns kennara allt frá leikskóla upp í háskóla.



Þá er rætt við Braga Guðmundsson, formann kennaradeildar Háskólans á Akureyri, sem bendir á að kennurum sjálfum hafi verið tíðrætt um bág launakjör. „Og vafalítið hafa þau ráðið einhverju um dapra aðsókn karlmanna í kennaranám,“ segir hann og vonar að með bættum launum og breyttu starfsumhverfi í kjölfar síðustu kjarasamninga verði breyting þar á.