Landsmenn hlýðnir í ofsanum

Veðurofsinn sem gekk yfir og landið í fyrradag og síðustu nótt olli nokkru tjóni vítt og breitt um landið. Rafmagnslaust varð á stórum svæðum þar sem flutningskerfið réði ekki við veðurofsann. Skaftafellssýslur í suðaustri duttu út um tíma, en einnig var rafmagnslaust á öllu Austurlandi, Norðurlandi og Vestfjörðum. Mikið var að gera hjá starfsmönnum Landsnets við að reyna að halda raforkukerfinu gangandi.

Nokkra daga mun nú taka fyrir starfsmenn Landsnets og RARIK að koma flutningskerfi raforku í samt lag. Umtalsvert tjón varð á flutningskerfinu í óveðrinu og línur féllu niður á fimm stöðum á landinu. „Landsnet vonast til að viðgerð ljúki á næstu tveimur sólarhringnum á byggðalínuhringnum sem laskaðist í óveðrinu. Ljóst er að viðgerð á línum á Vestfjörðum mun taka lengri tíma. Þegar verst lét var straumleysi mjög víðtækt rekstur flutningskerfisins tvísýnn og er það enn. Tjón Landsnets er talsvert og talið að það verði líklega yfir 100 milljónir króna,“ segir í tilkynningu Landsnets.

Óveðrið skall fyrst á Suðurlandið um miðjan dag í gær með aftakaveðri í Vestmannaeyjum. Síðan færðist óveðrið hægt og rólega yfir landið og um miðja nótt var orðið mjög hvasst á Vestfjörðum og í Skagafirði, þar sem vindur náði um 40 metrum á sekúndu þegar mest lét.

Björgunarsveitir á landinu öllu sinntu hátt í fjögur hundruð útköllum í gær vegna veðurofsans. Hæst fór vindurinn í 72,6 metra á sekúndu á Hallormsstaðahálsi um ellefu leytið í fyrrakvöld sem samsvarar 260km hraða á klukkustund. Yrðu menn vart til frásagnar stæðu þeir úti í slíkum vindi.

Vegagerðin ákvað í samráði við lögreglu og björgunarsveitir að morgni mánudagsins að loka mörgum vegarköflum til að fyrirbyggja óhöpp. Fréttablaðið hefur náð tali af mörgum formönnum aðgerðastjórna Landsbjargar. Eru þeir á einu máli um að þetta fyrirkomulag hafi heppnast og minnkað álag á björgunarsveitirnar. Með því móti hafi verið hægt að takast á við öll þau útköll sem bárust og að hætta á manntjóni hafi verið lítil sem engin.

Einnig eru aðgerðastjórarnir sem Fréttablaðið ræddi við á einu máli um að landsmenn hafi farið eftir fyrirmælum Almannavarna og að það hafi verið lykillinn að því að lágmarka tjón af völdum veðurofsans. Jón Hermannsson, svæðisstjóri Rangárvalla- & Vestur Skaftafellssýslu, segir veðrið geta valdið stórhættu fyrir ferðamenn. „Það sem skiptir líka máli er að allir lögðust á eitt við að koma skilaboðum áleiðs. Erlendir ferðamenn á svæðinu vissu allflestir um hvað var í vændum. Við þurftum ekki að bjarga þeim eftir að rúður höfðu brotnað í bílum þeirra eins og við höfum oft þurft að gera. Þetta fyrirkomulag var til fyrirmyndar,“ segir Jón.