Öllu nema jólakettinum stolið af Langlegg og Skjóðu: „Þetta er alveg ömurlegt“

Óprúttinn aðili braust inn í bíl Andreu Aspar Karlsdóttur á aðfaranótt mánudags við Brautarholt í Reykjavík og lét þar greipar sópa um leikmuni og hljóðfæri sem Andrea og félagar hennar, Langleggur og Skjóða nota til að skemmta börnum víðsvegar um landið.

„Þetta er alveg ömurlegt. Í bílnum voru öll hljóðfæri, hljóðnemar og nánast allir leikmunir fyrir Langlegg og Skjóðu.“

Andrea, jólakötturinn, jólasveinar, Langleggur og Skjóða sjá um að halda jólaböll og skemmtanir fyrir börn og höfðu nýlokið tveimur sýningum. Því var allt hafurtaskið í bíl Andreu en nágranni hennar lét hana vita að því að búið væri að brjótast inn í bíl hennar.

„Ég var að vinna heima um morguninn. Um hádegi bankar nágranni minn upp á hjá mér og spyr hvort að það sé búið að brjótast inn í bílinn minn. Ég segi bara „ha, nei!“, hleyp út og sé að það er búið að brjóta hliðarrúðu í bílnum.“

Jólakötturinn slapp

Verðmæti þess sem var stolið er hátt í 350.000 krónur en meðal þess sem var tekið var nýtt rafmagnspíanó, hljóðnemar og nánast allir leikmunir sem notaðir eru í sýningu leikhóps Andreu sem sér þó ljósið í myrkrinu því að jólakötturinn, sem sjá má hér til hægri, slapp undan þjófunum.

„Ég er búinn að eyða alveg endalausum tíma í jólaköttinn og sem betur fer var hann inni hjá mér. Það var smá rifa á brúðunni og ég tók hann inn með mér til þess að laga hann.“

Eins og við er að búast er nóg að gera hjá þeim öllum í desember enda mikið um jólaböll og skemmtanir. Því mætti ef til vill búast við að desember væri hreinlega ónýtur fyrir hópinn. Svo er ekki enda kom hjálp úr óvæntri átt.

„Vegna óveðursins á mánudeginum var búið að fresta öllum sýningum á þriðjudaginn. Ég gat því reddað öllu því sem við þurfum til þess að halda sýningar. Ég gat meira að segja látið laga bílinn minn en snillingarnir á bílrúðuverkstæðinu tóku hann inn fyrir mig á mánudeginum og redduðu þessu.“

Biður fólk um að hafa augin opin fyrir því sem var stolið

Andrea er blessunarlega tryggð fyrir stuldinum og hefur kært málið til lögreglu. Hún á reyndar ekki endilega von á því að þjófurinn eða þjófarnir finnist en í þjófnaðinum var hanski skilinn eftir. Hún vill þó endilega endurheimta því sem var stolið og biðlar til allra að hafa augun opin.

„Ég er búin að setja upplýsingar um það sem var stolið á allar þessar helstu síður þar sem hljóðfæri eru seld. Það er mjög mikilvægt að fólk komist ekki upp með að stela bara hlutum.“