Hreindýrakvótinn ekki fullnýttur

Hreindýraveiðar gengu illa þetta árið og þegar tímabilið í ár var gert upp kom í ljós að 103 dýr af þeim 1.412 sem veiða mátti náðust ekki.

Þetta kemur meðal annars fram í nýju og veglegu tímariti Skotvís sem nú fagnar 20 ára útgáfuafmæli.

Tímaritið vitnar í Jóhann G. Gunnarsson, sem hefur umsjá með hreindýraveiðum fyrir hönd umhverfisstofnunar, með það að ýmsar ástæður séu fyrir þessu en einkum þó þær að illa hafi gengið að endurúthluta leyfi sem skilað var inn síðari hluta veiðitímabilsins.

Vísir hefur fjallað um þessi mál en endurúthlutun er ýmsum annmörkum háð, bæði er að menn sem eru á biðlista hafa ráðstafað tíma sínum og eða að þeir hafi ekki tekið áskilið skotpróf og það aftri því að menn stökkvi til þá er kallið kemur.