Þórdís Ylfa og Ragnar meistarar

FH-ingar voru sigursælir á Íslandsmeistaramótinu í skylmingum með höggsverði og eignuðust Íslandsmeistara í bæði kvennaflokki sem og opnum flokki.

Þórdís Ylfa Viðarsdóttir vann gull í kvennaflokki og Aldís Edda Ingvarsdóttir varð önnur. Freyja Sif Stefnisdóttir, Skylmingafélagi Reykjavíkur, var efst eftir riðlakeppnina en endaði í þriðja sæti.

Úrslitarimma Þórdísar Ylfu og Aldísar Ebbu var æsispennandi en svo fór að sú fyrrnefnda vann með minnsta mun, 15-14. Báðar höfðu þær talsverða yfirburði í undanúrslitaviðureignum sínum.

Í opnum flokki varð Ragnar Sigurðsson Íslandsmeistari en Gunnar Egill Ágústsson, sem var efstur að lokinni undankeppninni, mátti sætta sig við silfur. Guðjón Ragnar Brynjarsson vann brons en allir þrír koma úr skylmingadeild FH.

Ragnar hafði betur gegn Gunnar Agli, 15-11, í úrslitaviðureigninni.