Gæsluvarðhald staðfest yfir manni sem er grunaður um kynferðisbrot í tjaldi í Hrísey

Hæstiréttur staðfesti í dag gæsluvarðhaldsúrskurð Héraðsdóms Norðurlands eystra yfir karlmanni á þrítugsaldri sem grunaður er um líkamsáras og tilraun til nauðgunar gegn sautján ára stúlku á tjaldsvæðinu í Hrísey þann 25. júlí sl.

Hann var úrskurðaður í gæsluvarðhald 11. nóvember sl af Héraðsdómi Norðurlands eystra þegar niðurstöður úr DNA-rannsóknum lágu fyrir. Hann kærði úrskurðinn til Hæstaréttar.

Stúlkan var ferðamaður hér á landi. Hún greindi lögreglu frá því að hún hefði sofnað um miðnætti þá nótt sem atvikin áttu sér stað. Hún hefði svo vaknað um nóttina við að karlmaður hefði verið kominn inn í tjaldið til hennar.

Samkvæmt frásögn hennar beitti hann hana valdi, hótaði henni og reyndi að hafa við hana samfarir og haft sáðfall.

Sæði úr bakpoka stúlkunnar reyndist vera úr manninum.

Karlmaðurinn sem nú hefur verið úrskurðaður í gæsluvarðhald var handtekinn 25. júlí á heimili sínu. Þar fann lögregla fatnað sem samrýmdist lýsingu brotaþola.

Á hendi eða fingri sakbornings var áverki sem lögregla telur að geti samsvarað því að hann hafi verið bitinn en stúlkan hafði lýst því fyrir lögreglu að hún hefði náð að bíta manninn í aðra höndina.

Gerð var DNA-rannsókn á sæði sem fannst á eða í svefnpoka stúlkunnar. Þrjú sýni voru send til rannsóknar og leiddi hún í ljós að sæðið reyndist vera úr manninum og taldi lögreglan því sterkan grun um að karlmaðurinn hefði framið það brot sem hann er sakaður.

Karlmaðurinn verður því í gæsluvarðhaldi til 10. desember en að mati lögreglunnar á Norðurlandi Eystra þykja ríkir almannahagsmunir standa til þess að maður sem sterklega er grunaður um svo alvarlegt brot gangi ekki laus.