Skólastjórar bjartsýnni en háskólakennarar

Vonir standa til þess að samningi verði náð í kjaraviðræðum Sambands íslenskra sveitarfélaga við Skólastjórafélag Íslands í Karphúsinu á morgun. Skólastjórar, sem ekki hafa verkfallsrétt, eru orðnir afar langeygir eftir samningi og hafa rætt bæði uppsagnir og skærur vegna stöðunnar.

Svanhildur María Ólafsdóttir, formaður Skólastjórafélags Íslands, staðfestir að viðræður við samninganefnd sveitarfélaganna hafi tekið kipp síðasta föstudag, eftir nokkurn hægagang.

„Við vorum langt komin með viðræður í framhaldi af gerðardómi í ágúst, en síðan þegar SALEK-viðræðurnar fóru af stað varð ákveðið stopp í viðræðum,“ segir hún. 

Núna fyrir helgi hafi hins vegar hafist á ný vinna við að reyna að ljúka samningum. 

„Og horfði nú kannski ekki alveg vel fyrsta kastið, en við náðum munnlegu samkomulagi á föstudaginn sem við munum ganga frá í þessari viku.“ Svanhildur segist því gera sér vonir um að ljúka málinu á næsta samningafundi, sem er á morgun, miðvikudag.

Á morgun funda líka með samninganefnd ríkisins Félag prófessora í ríkisháskólum og Félag háskólakennara. Fyrrnefnda félagið hefur boðað undirbúning atkvæðagreiðslu um verkfallsboðun í desember vegna hægagangs við samningagerðina.

Jörundur Guðmundsson, formaður Félags háskólakennara, segir að á samningafundi fyrir helgi hafi ríkið kynnt ákveðinn ramma sem enn sé til skoðunar hjá félögunum. 

„Við erum bara að skoða það og stilla okkur saman. Það voru nokkur félög sem ekki voru með þessum átján í BHM og erum við núna að byrja að tala um okkar sérmál.“ Innan rammans sem kynntur hafi verið segir Jörundur að finna hluta af því sem samið hafi verið um í SALEK-samkomulaginu.

Hvort líklegt sé að þarna sé kominn grundvöllur til þess að ljúka samningum segir Jörundur ekki enn hægt að segja nokkuð um. Félögin þurfi ráðrúm til að meta stöðuna. 

„En óneitanlega er þetta erfið staða eftir að BHM felldi þetta [SALEK] samkomulag og svo eru félög utan við það sem eru ekki í gerðardómsmálinu,“ segir Jörundur.

Ólíkt Félagi prófessora hafa háskólakennarar enn ekkert ályktað eða lagt fyrir stjórn, eða félagsfund, um mögulegar verkfallsaðgerðir. Fundinn á morgun segir Jörundur hins vegar kunna að ráða einhverju um framhaldið hvað slíkt varðar.