Facebook hætti að fylgjast með fólki sem ekki er skráð

Dómstóll í Belgíu hefur skipað Facebook að hætta að fylgjast með og halda gögn um fólk sem ekki er skráð á samfélagsmiðilinn. Fyrirtækið hefur tvo sólarhringa til að verða við skipuninni. Facebook segist hins vegar ætla að áfrýja dómnum, en málið tengist svokallaðri vefköku sem fyrirtækið hefur notað í fimm ár.

Hún er skráð í tölvu fólks sem fer inn á Facebook þrátt fyrir að vera ekki skráð þar. Dómstóllinn vill meina að Facebook þurfi að biðja um leyfi til að afla gagna um þetta fólk. samkvæmt BBC.

Vefkökur eru einfaldar skrár sem segja til um hvaða heimasíður viðkomandi hefur heimsótt. Þær eru einnig notaðar til að sjá á hvað notandinn smellti og hve lengi hann var á heimasíðunni.

Verði Facebook ekki við skipun dómstólsins gæti fyrirtækið átt yfir höfði sér allt að 250 þúsund evra sektir á degi hverjum. Það samsvara um 35 milljónum króna á dag.