Laun á almennum markaði verða leiðrétt

Formaður Starfsgreinasambandsins segir augljóst að leiðrétta verði laun allra stéttarfélaga innan sambandsins upp úr áramótunum. Hann reikni með að það geti gerst án átaka en að öðrum kosti séu uppsagnarákvæði í kjarasamningunum.

Í kjarasamningum á almennum vinnumarkaði eins og VR og stéttarfélaga innan Starfsgreinasambandsins eru rauð strik varðandi launahækkanir annarra eftir að þeir kjarasamningar voru gerðir, sem og um þróun kaupmáttar. Endurskoða á kjarasamningana fyrir 28. febrúar í þessu tilliti.

Í vikunni var síðan gengið frá svo kölluðu SALEK samkomulagi milli aðila vinnumarkaðrins, stjórnvalda og sveitarfélaganna sem setur ramma utan um launaþróunina fram til ársins 2019 og er þar miðað við ríflega 30 prósenta launahækkun á tímabilinu.

Björn Snæbjörnsson formaður Starfsgreinasambandsins segir augljóst að launafólk muni fá viðbótar launahækkanir upp úr áramótunum miðað við þessar forsendur.

„Það þarf að gera það og það er verkefni sem við munum fara í. Við þurfum að ganga frá því fyrir 1. febrúar að ná samkomulagi við Samtök atvinnulífsins um þessa leiðréttingu,“ segir Björn

Laun almenns launafólks muni því væntanlega hækka um nokkur prósent. En Björn segir að innan Alþýðusambandsins eigi menn eftir að fara yfir málið og finna út hvað leiðréttingin þurfi að vera mikil áður en viðræður um hækkun launa í kjarasamningunum verði rædd við Samtök atvinnulífsins.

Og heldur þú að það muni gerast átakalaust?



„Það er náttúrlega búið að ná þarna ákveðinni niðurstöðu. Það þýðir að það sem vantar upp á verður að leiðrétta. Þannig að ég hef trú á að það geti gengið eðlilega fyrir sig,“ segir Björn.

Annars væri SALEK samkomulagið til lítils?

„Ef ekki næst samkomulag þá er uppsagnarheimild fyrir hendi. Þannig að þá fellur þetta bara ef ekki er hægt að ná samkomulagi,“ segir Björn Snæbjörnsson.