Leit stendur yfir að milljónamæringi

Íslensk Getspá leitar að milljónamæringi sem ekki hefur enn vitjað vinnings síns frá því í Lottóinu síðasta laugardag. Vinningurinn var upp á 22,5 milljónir króna en miðinn var keyptur hjá N1 í Ártúnsbrekku eftir hádegi á föstudaginn fyrir viku. Um er að ræða tíu raða sjálfvalsmiða ásamt Jóker.

Inga Huld Sigurðardóttir, markaðsstjóri Íslenskrar getspár, segist bjartsýn á að miðans verði vitjað. „Viðkomandi hefur kannski verið á leiðinni út úr bænum,“ segir Inga. Íslensk getspá leggi mikið upp úr því að hafa uppi á vinningshöfum sínum.

Vinningshafinn hefur eitt ár til þess að vitja vinningsins. Annars rennur peningurinn til eigenda Íslenskrar getspár sem eru Íþrótta- og Ólympíusamband Íslands, Öryrkjabandalagið og UMFÍ.