Dularfullt innbrot á Álftanesi til skoðunar

Lögregla á höfuðborgarsvæðinu hefur til skoðunar hvort innbrot hafi átt sér stað á heimili á Álftanesi síðdegis í gær þar sem ungur drengur var einn heima. Foreldrar barna í fimmta bekk Álftanesskóla fengu í dag tölvupóst frá skólastjóra vegna málsins.

Þar kom fram að drengurinn hefði brugðist hárrétt við. Drengurinn hafi náð að forða sér og hringja í foreldra sína þegar brotist var inn.

Sævar Guðmundsson, aðalvarðstjóri hjá lögreglunni á höfuðborgarsvæðinu, segir málið í skoðun í rólegheitum. Ekkert bendi til þess að brotist hafi verið inn en málið verði áfram skoðað í samvinnu við foreldra drengsins.

Móðir á Álftanesi, sem býr í sömu götu, segir að íbúar í hverfinu þurfi að vera vakandi. Barn hennar hafi hringt dauðskelkaður í sig í gær og verið sannfærður um að einhver hefði komið inn í húsið þeirra.

„Hann var einn heima og útidyrnar stóðu allt í einu opnar upp á gátt þegar hann kom fram. Hundurinn geltandi sem óður væri,“ sagði móðirin í Facebook-hópnum Íbúar Álftaness.

Uppfært klukkan 23:30

Fréttin hefur verið uppfærð eftir samtal við foreldra drengsins og fyrrnefndar upplýsingar frá íbúa í nágrenninu.