Hlýnandi veður næstu tvo daga

Töluverð hlýindi eru í spákortum Veðurstofu Íslands fyrir næstu daga, svona ef tekið er inn í reikninginn að komið er fram í lok októbermánaðar.

Á morgun verður suðaustan og austan átt og gert ráð fyrir súld eða rigningu með köflum. Landsmenn mega eiga von á 6 til 12 stiga hita og verður svipað veður á fimmtudag þar sem hiti gæti náð yfir tíu stig í Reykjavík svo dæmi séu tekin.

Þetta er töluverð sveifla frá mánudeginum en þá var víðast hvar frost á landinu. Fór frostið alveg niður í sjö stig klukkan 9 á mánudagskvöld á Akureyri en búast má við allt að átta stiga hita þar á fimmtudag.

Veðurhorfur á landinu næstu daga samkvæmt textaspá Veðurstofu Íslands:

Á fimmtudag:

Austanátt, víða 13-20 m/s og jafnvel hvassara um tíma með S-ströndinni. Víða vætusamt, talsverð rigning á SA-landi og Austfjörðum. Hiti 6 til 12 stig.

Á föstudag:

Suðaustan 8-15 m/s og rigning með köflum, en heldur hægari og þurrt N-lands. Hiti 2 til 7 stig.

Á laugardag:

Norðlæg átt 5-13 m/s um landið A-vert og rigning eða slydda. Hægari vindur og þurrt V-til. Hiti 1 til 6 stig.

Á sunnudag og mánudag:

Suðlæg átt og rigning með köflum, en úrkomulítið á N- og A-landi. Hiti 2 til 8 stig.

Á þriðjudag:

Suðvestanátt og skúrir eða slydduél, en léttskýjað NA- og A-lands. Hiti 1 til 6 stig.