Forsætisráðuneytið skoðar uppbyggingu á stjórnarráðsreitnum

Til skoðunar er innan forsætisráðuneytisins að dusta rykið af gömlum hugmyndum um að reisa nýbyggingar fyrir ráðuneytin á stjórnarráðsreitnum, sem afmarkast af Ingólfsstræti, Skúlagötu, Klapparstíg og Lindargötu.

Stefán Thors, nýskipaður húsameistari ríkisins, segir stöðuna í húsnæðismálum ráðuneytanna vera nokkuð erfiða enda séu þau oft dreifð og í mörgum byggingum. „Almennt er húsnæðisvandi í stjórnarráðinu sem þarf að taka á,“ segir Stefán.

„Það var á sínum tíma arkitektasamkeppni um skipulag fyrir þetta svæði. Einn möguleiki er að fara skoða þetta svolítið aftur og fara að safna ráðuneytinu saman dálítið betur á afmarkað svæði,“ bætir Stefán við.

Hugmyndasamkeppnin fór fram árið 2002 um byggingu sem hýsa átti dóms- og kirkjumálaráðuneytið, heilbrigðis- og tryggingamálaráðuneytið og umhverfisráðuneytið.

Vinningstillagan, frá arkitektastofunni Franken Architekten GmbH, hljóðaði upp á fjögurra hæða 4.800 fermetra byggingu auk tveggja hæða bílakjallara við Sölvhólsgötu 9-11. Auk ráðuneytanna var stefnt að því að þar yrðu fundarsalir og mötuneyti til sameiginlegra afnota ráðuneytanna og annarra stofnana á stjórnarráðsreitnum.

Byggingin átti að vera fyrsta skrefið í að koma öllum ráðuneytum landsins á stjórnarráðsreitinn. Utanríkisráðuneytið, velferðarráðuneytið og forsætisráðuneytið eru einu ráðuneytin sem ekki eru á reitnum.

Stefán segir eina hugmyndina vera um að reisa nýbyggingu á milli gamla dómshúss Hæstaréttar Íslands við Lindargötu og íþróttahúss Jóns Þorsteinssonar, þar sem Þjóðleikhúsið er nú með leiksviðin Kassann og Kúluna. „Og svo aftur önnur hús sitt hvorum megin við Sölvhólsgötuna.“