Sprenging í sölu nýrra rafbíla

Búið er að selja ríflega tvöfalt fleiri nýja rafmagnsbíla það sem af er þessu ári en allt síðasta ár. 240 nýir rafmagnsbíla hafa selst á þessu ári en í fyrra seldust 90 rafmagnsbílar, 49 árið 2013 og 10 rafmagnsbílar árið 2012.

Helsta skýringin á aukinni sölu er að virðisaukaskattur af bílunum var felldur niður 1. janúar 2014 að sögn Özurar Lárussonar, framkvæmdastjóra Bílgreinasambandsins. Þá séu engin vörugjöld greidd af rafmagnsbílum þar sem þeir losi ekki koltvísýring. Því sé nú hægt að kaupa nýjan rafmagnsbíl hér á landi á þrjár til fjórar milljónir króna.

Özur segir hjálpa til að rekstrarkostnaður rafmagnsbílanna sé lágur auk þess sem drægi þeirra sé að aukast. „Með hverri kynslóð af nýjum rafmagnsbíl kemur betri bíll, betri rafhlaða og meira drægi.“

Reikna megi með að hægt sé að komast á 80-120 kílómetra á einni hleðslu. Þeir séu því kjörnir fyrir hefðbundinn innanbæjarakstur, úr og í vinnu. „En ef þú ætlar að fara í lengri ferðalög hentar þetta engan veginn,“ bendir Özur á.

Hins vegar liggi fyrir að drægi rafmagnsbílanna muni batna og þeir muni lækka í verði á næstu árum. En til þess að rafmagnsbílar verði raunhæfur valkostur á ferðum um landið þurfi að koma upp hraðhleðslustöðvum hringinn í kringum Ísland.