Rúmlega sjö þúsund króna verðmunur á umfelgun

Allt að rúmlega sjö þúsund króna verðmunur er á þjónustu við dekkjaskipti samkvæmt verðkönnun verðlagseftirlits Alþýðusambands Íslands. Titancar var alltaf með lægsta verðið en Gúmmívinnustofan SP dekk var oftast með hæsta verðið.

Eftirtalin bifreiðaverkstæði neituðu þátttöku í verðkönnun verðlagseftirlits ASÍ: N1, Nesdekk, Sólning, Dekkjahöllin, Barðinn, Bifreiðaverkstæði Grafarvogs, Klettur, Bílverið og Hjólbarðaverkstæði Kaldasels.

Mesti munurinn var á dekkjaskiptum á jeppa með 18 tommu álfelgu. Það var ódýrast hjá Titancar, sex þúsund krónur, og dýrast hjá Gúmmívinnustofunni SP dekk, 13.179 krónur. Verðmunurinn var 7.179 krónur, eða 120 prósent.

Verðmunurinn var minnstur á dekkjaskiptum fyrir smábíl, minni meðalbíl og meðalbíl. Sem áður var þjónustan ódýrust hjá Titancar, 4.500 krónur, en dýrust var hún hjá Toyota, 7.607 krónur. Munurinn var 3.17 krónur eða 69 prósent.

Í könnunni kemur fram að sex hjólbarðaverkstæði voru með sama verð og í fyrra á dekkjaskiptum á meðalbíl með 15 tommu álfelgu. Mesta hækkunin var hjá Dekkverk, tuttugu prósent, og Dekkjahúsinu, átján prósent.

Þá hefur verðið lækkað hjá Betra gripi og Vöku.