Erlendum ferðamönnum bjargað úr Hólmsá

Björgunarsveitir voru kallaðar út á sjöunda tímanum í kvöld til þess að aðstoða ferðamenn sem höfðu fest bíl sinn nálægt vaðinu á Hólmsá í Vestur-Skaftefellssýslu.

Neyðarboð barst í gegnum svokallað Spot-tæki og voru björgunarsveitirnar Stjarnan í Skaftártungu og Lífgjöf í Álftaveri kallaðar út. Björgunarveitin Stjarnan kom á staðinn um klukkan 19:40. Þá kom í ljós að bíll var fastur í Hólmsá og fjórir erlendir ferðamenn biðu átekta á toppi bílsins.

Fleiri ferðalangar voru á bílum við ána og höfðu þeir ekið þangað sem var símasamband og gátu gefið upplýsingar um ástandið. Björgunarsveitarmönnum tókst að ná ferðafólkinu á þurrt rétt í þann mund sem þyrla Landhelgisgæslunnar, sem einnig var kölluð út, kom á staðinn. Þyrlunni var þá snúið til baka.