Stefnir í besta bílasöluár frá upphafi í Bandaríkjunum

Svo vel gekk að selja nýja bíla í Bandaríkjunum í september að nú eru miklar líkur á því að þetta ár muni slá við mesta bílasöluári landsins, síðan árið 2000. Þá seldust 17,395 milljón bílar, en nú gæti salan slegið hátt í 18 milljón bíla.

Salan í September jókst frá fyrra ári um 15,8% og verður það að teljast vænn vöxtur því salan í fyrra var einkar góð og endaði í rétt um 17 milljón bílum. Stóru bandarísku framleiðendunum gekk vel í síðasta mánuði og Ford náði 23,4% söluaukningu, Fiat/Chrysler 13,6% aukningu og GM 12,5%.

Mestu aukningu allra bílaframleiðenda náði Land Rover með 88,5% meiri sölu, en Mitsubishi náði 36% aukningu og Subaru 28%. Næstum allir bílaframleiðendur náðu reyndar aukningu í sölu og af þýsku framleiðendunum náði Porsche besta árangrinum með 23% aukningu og Audi var með 16% aukningu.

Gríðarleg sala er í pallbílum og stórum jeppum frá bandarísku framleiðendunum. Sem dæmi um það seldust í þessum eina septembermánuði 70.000 Ford F-150 pallbílar, en það jafnast á við sexfalda heildarsölu allra bíla á Íslandi allt árið í fyrra. Víst era ð það skaðar ekki söluna í Bandaríkjunum í ár að verð á eldsneyti er afar lágt og hefur l´kkað mikið á árinu. Ennfremur gengur vel í efnahagslífinu.