Nýjar tölur úr laxveiðiánum

Nýjar vikutölur frá Landssambandi Veiðifélaga voru birtar í gær og þrátt fyrir að haustið sé mætt er veiðin víða mjög góð.

Það sem hefur áhrif á veiðitölur í þessari viku er afleitt veiðiveður um helgina en víða, t.d. á vesturlandi var varla stætt vegna hvassviðris. Ytri Rangá heldur toppsætinu á listanum með 5.631 lax og sú á nóg inni en alls veiddust 722 laxar í henni í liðinni viku. Miðfjarðará stendur í dag í 4.978 löxum og þarf ekki nema 22 laxa til að rjúfa 5.000 laxa múrinn og þá er það í fyrsta skipti sem sjálfbær laxveiðiá nær þeirri tölu. Alls veiddust 533 laxar í Miðfjarðará í vikunni sem leið.

Ennþá eru rétt um þrjár vikur eftir af veiðitímanum svo árnar eiga margar hverjar nokkuð inni og eins og áður segir veiðist ennþá gríðarlega vel í mörgum ánum. Núna gengur fyrsta sunnanáttin yfir landið með úrhelli á vesturlandi sem á eftir að hleypa miklu lífi í árnar þar sem hafa ekki fengið mikla rigningu í sumar. Það styttist jafnframt í fyrstu lokatölur og eins og listinn sem Þorsteinn frá Skálpastöðum tekur saman ber með sér er þetta sumar þegar orðið eitt af þeim bestu í flestum ánum. Listann í heild sinni má finna hér.