Skyr-smoothie í fjörutíu fylkjum Bandaríkjanna

Skyr-smoothie, sem fyrirtækið B’more Organic framleiðir í Maryland, er nú komið í sölu í fjörutíu fylkjum Bandaríkjanna. Andrew Buerger, stofnandi fyrirtækisins, segir mikla eftirspurn hafa verið eftir próteinríkum og hollum drykkjum í Bandaríkjunum og fara nú vinsældir B’more vaxandi.

Eftir ferð til Íslands árið 2010 stofnaði Andrew Buerger ásamt konu sinni fyrirtækið B’more Organic til að framleiða skyrsmoothie fyrir Bandaríkjamarkað. Nafnið er tilvísun í Baltimore, borgina þar sem skyrið er framleitt. Fyrirtækið leggur mikið upp úr lífrænni og sjálfbærri framleiðslu og notar einungis vörur úr nágrenninu. Í upphafi var varan einungis seld á austurströnd Bandaríkjanna í Whole Foods og öðrum sérvöruverslunum. Nýlega gerði Buerger hins vegar samning við bandarísku verslanakeðjurnar Kroger, Harris Teeter og Lowes Foods og fór frá því að selja vörurnar í 10 fylkjum yfir í 40 samtals.

Forsaga fyrirtækisins er sú að þegar Buerger var í göngu á Hvannadalshnjúk til að safna áheitum fyrir góðgerðarsamtökunum Jodi’s Climb for Hope, sem fjármagna rannsóknir á MS og brjóstakrabbameini, var honum gefið skyr. Buerger, sem er með mjólkuróþol, smakkaði það sem hann taldi vera jógúrt en veiktist ekki af því. Þegar honum var sagt betur frá skyrinu taldi hann sig vera búinn að uppgötva heilsusamlegustu vöru heims; próteinríka með engri fitu og nánast engum sykri. Buerger ákvað strax að hann vildi fara að flytja inn skyr til Bandaríkjanna. Fljótlega kom þó í ljós að það voru nokkrir aðilar á markaðnum að gera það. Hann fann þó sitt eigið sérkenni og hóf að framleiða skyr-smoothie í staðinn.

Uppskriftin er íslensk að uppruna en var svo þróuð með vísindamönnum úr háskólanum í Vermont. Engir Íslendingar hafa komið að henni. Buerger segir að því miður vinni þeir ekki með Íslendingum. Hins vegar sé hann í viðræðum við íslenskan fjárfesti.

Buerger hefur ekki snúið aftur til Íslands frá fyrstu ferðinni en segir þau hjónin elska Ísland og geta ekki beðið eftir að koma aftur. Aðspurður segist hann bjartsýnn á framtíðina. Fyrirtækið fer stækkandi og telur hann að það sérkenni drykkjarins að hafa engan við- bættan sykur geri hann einstakan