Hlustun hætt um leið og ljóst var að símtal var milli verjanda og sakbornings

Meðal vitna sem gáfu skýrslu í Héraðsdómi Reykjavíkur í dag í Marple-málinu voru lögreglufulltrúarnir Sveinn Ingiberg Magnússon og Hinrik Pálsson sem störfuðu um skeið hjá sérstökum saksóknara.

Sveinn var fyrst spurður af Halldóri Þ. Birgissyni um hví skjólstæðingur hans, Skúli Þorvaldsson, hefði fyrst verið yfirheyrður sem vitni en réttarstaða hans síðar breyst.

„Fyrsta yfirheyrslan átti sér stað í maí 2010 og þá vildi Skúli fá að hafa lögmann viðstaddan en því var neitað þar sem hann var vitni á þeim tímapunkti,“ sagði Halldór. Sveinn svaraði því til að það hefði ekki gerst fyrr en rannsókn var vel á veg kominn að grunur féll á Skúla.

Efast um að málið standi og falli með einum pósti

„Í upphafi var málið stærra og teygði anga sína víðar og fókusinn hafi verið á öðrum stað. Við sáum að Skúli var „beneficial owner“ Marple en vissum í raun ekkert meira. Hins vegar þegar við skoðuðum málið betur og sáum streymi peninga til Marple og þaðan til annara félaga Skúla breyttist réttarstaða hans,“ sagði Sveinn.

Sveinn var einnig spurður um tölvupóst frá Bjarka Diego, fyrrverandi útlánastjóra Kaupþings, til starfsmanns síns. Pósturinn var sendur í febrúar 2008 en í honum biður Bjarki undirmann sinn um að fjarlægja Marple af lista yfir félög tengd Skúla. Afrit af póstinum var bætt við gögn málsins fyrir viku síðan.

„Öll gögn sem hafa sönnunargildi eru meðal gagna málsins,“ sagði Sveinn. Hann gat ekki svarað því hvers vegna þetta skjal skilaði sér svo seint í málið. „Ég leyfi mér að efast um að málið standi og falli með þessu eina skjali.“

„Ég man ekki eftir þessum tölvupósti og kann ekki skýringu á þessu,“ sagði Hinrik Pálsson aðspurður um sama póst. „Það eru ábyggilega milljónir tölvupósta sem liggja í kössum hjá sérstökum. Það er haugur af öðrum skjölum auk framburðar fólks sem benda til þess að Skúli hafi verið eigandi Marple.“

Þurftir að þekkja rödd verjandans

Lögreglumennirnir voru síðar spurðir af sækjanda út í símhlustanir embættis sérstaks saksóknara. Í gær kom fyrir dóminn Jón Óttar Ólafsson og sagði að það hefði gerst að starfsmenn embættisins hefðu átt það til að hlusta saman á upptökur af símtölum verjenda og sakborninga.

„Eðli málsins samkvæmt þurftum við að byrja að hlust á símtalið til að komast að því við hvern var rætt. Svo fór það eftir því hve snöggur þú varst að þekkja rödd verjandans hvenær þú hættir að hlusta,“ sagði Hinrik. Hann sagði að hann hefði sjálfur lent í því að heyra upphaf slíkra símtala og þegar það gerðist hefði hann hætt að hlusta og merkt þau svo enginn annar myndi hlusta á þau.

Málflutningur í málinu hefst í fyrramálið.