Hlustaðu á lagið sem kveikti í strákunum okkar fyrir Tékkaleikinn

Eins og frægt er orðið sigraði karlalandslið Íslands í knattspyrnu Tékka 2-1 á Laugardalsvelli í júní. Færri vita líklega hvaða lag það var sem kom okkar mönnum í gírinn áður en haldið var í leikinn.

Lars Lagerbäck sýndi markasyrpu Íslands úr undankeppninni á fundi með blaðamönnum í Laugardalnum í dag. Okkar menn hafa skorað fjórtán mörk í leikjunum sex og aðeins fengið á sig þrjú.

Undir hljómaði lagið You Win Again með bresk-áströlsku stórsveitinni Bee Gees sem er að sögn Heimis Hallgrímssonar í miklu uppáhaldi hjá Svíanum. Um fastan lið er að ræða í undirbúningi landsliðsins þar sem Dagur Sveinn Dagbjartsson hjá KSÍ klippir saman myndbönd fyrir fundi með leikmönnum.