Stýrivextir hækkaðir um 0,5 prósent

Peningastefnunefnd Seðlabanka Íslands hefur ákveðið að hækka stýrivexti um 0,5 prósentur. Meginvextir bankans, vextir á sjö daga bundnum innlánum, verða því 5,5 prósent. Þetta kemur fram í tilkynningu peningastefnunefndar.

Muni verðbólga aukast í framhaldi af kjarasamningum, eins og spáð er, mun peningastefnunefnd hækka vexti enn frekar eigi verðbólgumarkmið að nást til lengri tíma.

Í tilkynningunni segir að Seðlabankinn spái árlegum hagvexti um rúmlega fjögur prósent í ár og um það bil þrjú prósent næstu tvö árin.

„Á spátímabilinu er vöxturinn um ½ prósentu minni á ári en bankinn spáði í maí sl. Þetta er þó öflugur vöxtur enda fer framleiðsluspenna vaxandi á næstu misserum og hagvöxtur verður í ríkari mæli en á undanförnum árum drifinn af innlendri eftirspurn, ekki síst einkaneyslu. Fjárfesting verður hins vegar veikari en áður var spáð og vinnuaflseftirspurn vex hægar.“

Þá hefur verðbólga aukist undanfarið en er enn undir markmiðið Seðlabankans. Sérstaklega sé horft framhjá húsnæðislið verðvísitölunnar. Verðbólguhorfur hafa versnað verulega vegna niðurstöðu nýgerðra kjarasamninga og verðbólguvæntingar hafa hækkað.

„Spáð er að verðbólga verði komin í 4% snemma á næsta ári og verði á bilinu 4-4½% næstu tvö árin en hjaðni síðan í átt að verðbólgumarkmiðinu, enda felst í spánni að aðhaldsstig peningastefnunnar aukist á næstunni.“

Breyttar horfur vegna samninga

Í tilkynningunni segir að breytingar á efnahagshorfum frá því í maí, megi fyrst og fremst rekja til áhrifa mikilla launahækkana í kjölfar kjarasamninga og aukins peningalegs aðhalds sem fylgi þeim.

„Þær stafa þó einnig af alþjóðlegri þróun sem hefur stuðlað að meiri lækkun innflutningsverðs en áður var gert ráð fyrir og bættum viðskiptakjörum sem vinna á móti verðbólguáhrifum launahækkana. Gengi krónunnar hefur einnig hækkað lítillega þrátt fyrir mikil gjaldeyriskaup Seðlabankans.“

Vextir Seðlabanka Íslands verða samkvæmt þessu sem hér segir:

Daglán: 7,25 prósent.

7 daga veðlán: 6,25 prósent.

7 daga bundin innlán: 5,50 prósent.

Viðskiptareikningar: 5,25 prósent.

Peningastefnunefnd tók síðast vaxtaákvörðun þann 24. júní og þá voru vextir hækkaðir um 0,5 prósentur. Síðan þá hafa vextirnir verið 5 prósent. Næsta vaxtaákvörðun verður tekin þann 30. september.

Klukkan tíu verður vaxtaákvörðun peningastefnunefndar Seðlabanka Íslands kynnt og nýtt hefti af Peningamálum verður jafnframt aðgengilegt. Kynningin verður sýnd í beinni á Vísi.