Líkfundur í Laxárdal í Nesjum

Lögreglunni á Suðurlandi barst í gær tilkynning um líkfund í Laxárdal í Nesjum. Tilkynningin barst á lögreglustöðina á Höfn í Hornarfirði klukkan 16:11.

Lögreglumenn á Höfn fóru þegar á vettvang. Landhelgisgæslan lagði til þyrlu til að flytja rannsóknarlögreglumann frá rannsóknardeild lögreglunnar á Suðurlandi, lögreglumenn úr kennslanefnd ríkislögreglustjóra, rannsóknarlögreglumann frá tæknideild lögreglunnar á höfuðborgarsvæðinu og réttarlækni á staðinn.

Ekki hafa verið borin kennsl á líkið. Kennslanefnd hefur gefið út að líkið sé af ungum karlmanni, um það bil 186 sentimetrar á hæð, með ljóst axlasítt hár klætt í svarta strigaskó með hvítri stjörnu á hlið, dökkbláar íþróttabuxur og hettupeysu með áletrun að framan „QUICKSILVER“.

Lögreglan segir að ætla megi að maðurinn hafi látist fyrir einhverjum mánuðum síðan. Málið er í rannsókn og ekkert hægt að segja til um á þessu stigi með hvaða hætti andlát mannsins bar að.

Sveinn Kristján Rúnarsson, yfirlögregluþjónn Lögreglunnar á Suðurlandi, segir að frumskoðun á líkinu hafi farið fram en rannsókn sé stutt komin. Aðspurður segir Sveinn að listi yfir aðila sem vitað er að sé saknað á svæðinu sé ekki langur. Hins vegar sé ekki hægt að segja til um hvort að maðurinn tilheyri honum.

„Þetta er komið stutt á veg og við erum rétt að byrja. Kennslanefnd er að vinna á fullu við að bera kennsl á líkið. Þetta hefur sinn tíma.“

Lögreglan á Suðurlandi biðlar til allra þeirra sem gætu veitt upplýsingar sem gætu átt við lýsingu hér að ofan, þær má hringja inn í síma 842 4250.

Líkfundur í Laxárdal í Nesjum.Í gær, þriðjudag, klukkan 16:11 barst tilkynning á lögreglustöðina á Höfn í Hornafirði,...

Posted by Lögreglan á Suðurlandi on Wednesday, August 19, 2015