Sigmundur segir vanda Grikkja geta haft neikvæð áhrif hér á landi

Sigmundur Davíð Gunnlaugsson forsætisráðherra segir viðbúið að komi til efnahagssamdráttar á evrusvæðinu út af skuldavanda Grikklands muni það hafa neikvæð áhrif hér á landi.

Ekki er útilokað að Grikkir þurfi að yfirgefa evrusamstarfið vegna skuldavanda landsins. Sérfræðingar óttast að það muni grafa undan evrusasamstarfinu og hafa ófyrirsjáanlegar afleiðingar í för með sér fyrir efnahag ríkja Evrópusambandsins.

„Ef það að evrusamstarfið fari að rakna upp leiðir til efnahagskrísu í Evrópu. Þá augljóslega mun það hafa áhrif hjá okkur. Evrópa er þrátt fyrir allt enn þá lang stærsti útflutningsmarkaður okkar, þannig að niðursveifla hér hefur neikvæð áhrif á íslenskt efnahagslíf,” segir Sigmundur.

„En það er þá bara enn ein áminningin um mikilvægi þess að við höfum okkar efnahagsmál í lagi, svoleiðis að við getum tekið slíkum áföllum en einnig minnir okkur á mikilvægi þess að eiga viðskipti við aðrar þjóðir, sem víðast um heim.”